AINARO, STLNEWS.co – Lideransa Troika no Segundu Jerasaun Partidu FRETILIN, Lere Anan Timor prefere povu kuadru, militante no simpatizante sira atu kuda Partidu FRETILIN iha fuan, duke kuda bandeira iha dalan ninin, tanba Bandeira FRETILIN nee lulik Timor nian.
Kestaun nee Lere hatoo iha ambitu Partidu FRETILIN halao kampanha ba da-3, iha Munisipiu Ainaro, Domingu (23/04/20223).
“Ita haree bandeira barak mak kuda iha dalan ninin, maibe hau fiar katak ita idak-idak sei kuda bandeira FRETILIN iha nia fuan, tanba ida nee mak forti liu,” dehan Lere
Nia hatutan, uluk Indonezia nia tempu ema kuda bandeira merah putih barak hanesan nee, maibe ikus mai Timor-Leste manan hodi ukun aan duni.
Iha biban nee mos Lere dehan, atu lori moris diak ba povu, FRETILIN tenki ukun hodi kombate ka hamoos injustisa, korupsaun no familiarizmu, tanba FRETILIN laos partidu ida neebe atu hakiak ema naok ten no ema neebe hakarak buka deit kadeira.
Iha parte ketak, Sekretariu Jeral Partidu FRETILIN, Mari Alkatiri hatete, FRETILIN nia asaun labele hanesan ho sira nian, sira kuda bandeira FRETILIN mos kuda bandeira,” Ita nia bandeira la presiza kuda tanba ita nia bandeira nee lulik,” dehan SekJer partidu FRETILIN, Mari.
Aman fundador nasaun nee enkoraza kuadru, militante no simpatizante sira atu lalika preokupa ho partidu seluk nia bandeira no kores, maibe preokupa uluk ba aan rasik hodi hasai povu husi nakukun.
”Lalika preokupa ho sira nia bandeira no kores, maibe preokupa uluk mak ita nia aan rasik, ita hakarak halo sasan atu hasai ita hotu husi nakukun, nakukun nee laos eletrisidade, nakukun nee iha ita nia kakutak, tanba lideransa balu uza nostaljia atu manipula ita nia povu, ita tenki uza fali istoria atu harii fali lia loos,” hatete aman fundador nasaun nee.
(car)
