DILI, STLNEWS.co – Lideransa Partidu FRETILIN neebe lidera husi Sekretariu Jeral Mari Alkatiri ho Prezidente Francisco Guterres Lu Olo halao enkontru internal partidu nian ho ajenda simples, halo avaliasaun ba rezultadu eleisaun parlamentar tinan 2023 no perpektiva partidu nian ba oin.
Informasaun nee hatoo husi Flavio M. Guterres da Silva nudar Adjuntu Sekretariu Jeral (SekJer) Partidu FRETILIN ba jornalista Sira iha Salaun Igreja Katedral, Dili, Sabadu nee (05/08/2023).
Nia katak, ohin halao enkontru ho ajenda simples deit, halo avaliasaun ba rezultadu eleisaun parlamentar 2023, koalia konaba perspetiva Partidu FRETILIN ba oin.
“Ohin ami husi Partidu FRETILIN halao enkontru ho ajenda simples deit, halo avaliasaun konaba eleisaun parlamentar tinan 2023, koalia konaba perspetiva Partidu FRETILIN ba oin,” dehan Adjuntu Sekretariu Jeral Partidu FRETILIN, Flavio M. Guterres iha Salaun Igreja Katedral.
Nia dehan, foin daudaun nee Sekretariu Jeral Partidu FRETILIN, Mari Alkatiri orienta visi prezidente ho adjuntu sira atu halo avaliasaun iha nivel munisipal, tama too Postu Administrativu sira hodi rona estrutura sira nia hanoin, haree no saida maka estrutura sira sente iha eleisaun parlamentar ida nee.
“Tuir mai, ami nain 8, Visi Prezidente nain 3 ho Visi Sekretariu nain 5, ohin mai informa servisu neebe halao ona ba Komite Sentral Partidu FRETILIN, saida mak ami rona iha estrutura Partidu FRETILIN iha munisipiu sira,” haktuir nia.
Husi aprezentasaun Ida nee maka atu haree prespektiva Partidu FRETILIN ba oin, tanba liu husi enkontru ida nee, sei aprova rezolusaun lubuk ida, nunee haree ba oin husi nivel kraik too nasional.
Responde perguntas jornalista sira nian katak, reuniaun nee atu halo kongresu estraordinariu katak, laloos, ida nee reuniaun regular tuir estatutu Partidu FRETILIN dehan reuniaun regular nee tenki halao.
“Iha nee ami laiha ajenda espesifiku atu koalia Kona ba kongresu extraordinariu, ida nee laiha, tanba nee hau atu informa ba media katak tuir estatutu Partidu FRETILIN ninia, Lideransa neebe eleitu tiha ona, V Kongresu Nasional FRETILIN, laiha tan ema mai atu anula fali, tanba nee ita lao tuir estatutu,” afirma nia.
Tuir observasaun STL iha enkontru internal Partidu FRETILIN neebe halao iha salaun Igreja Katedral, enkontru nee naktaka ba publiku tanba koalia asuntu artidu nian.
(jos)
