DILI, STLNEWS.co – Loron 01 fulan Maiu nudar loron trabalhadores mundial, tanba nee Parlamentu Nasional (PN) husu atu governu, kompanhia dignifika trabalhadores i fo direitu ho los, labele viola.
Tuir Visi Bankada FRETILIN Josefa Álvares katak, ohin dia 1 Maiu nee importante tebes ba trabalhadores hotu iha mundu, espesialmente ba trabalhadores iha TL, neebe hotu-hotu fo nia esforsu tomak oinsa servisu atu servi família uma laran no estadu.
Tanba nee tenki fo onra i orgulhu ba trabalhadores tomak neebe sira nia esforsu halo ba bem estar família no estadu. Neebe hanoin ba loron ohin espesial ba trabalhadores, feto no mane iha mundu espesialmente iha Timor.
“Iha parte lubuk ida presiza tau atensaun, tanba trabalhadores sira nia salariu minimu tebes, tanba nee tenki atensaun, i presiza dignifika sira, labele viola direitu trabalhadores, maibe tenki fo direitu ho loos tuir lei hatete”, katak Visi Bankada FRETILIN Josefa Álvares ba STL Segunda (01/05/2023) liu husi telefone iha Dili.
Nia dehan, tenki haree mos tratamentu dezumanus no insultus ba trabalhadores sira. Presiza iha lei nee atu rigor tan oituan, hodi nunee tratamentu empredagador ba nia trabalhadores sira ho dignu, hanesan mos ser umanu neebe merese atu respeitu, kuidadu no konsidera.
Nia hatete, parte seluk mos bainhira sira moras tenki konsiderasaun atu fo tempu ba sira, hodi tratamentu ba sira nia direitu saude. Neebe situasaun sira nee tenki haree i haree mos ba sira nia direitu, tanba sira nia salariu kiik tebes.
“Konaba regras ba trabalhadores neebe servisu iha kompanhia sira iha ona, neebe bainhira kompanhia viola regras sira née, trabalhadores sira labele tauk atu hatoo ba organizasaun ka parte relevante, tanba viola regras sira mos tenki hatan ba violasaun sira nee”, katak Josefa.
Nia hatete, trabalhadores sira mos tenki matan moris neon nain, karik nain ba kompanhia viola sira nia direitu tenki hatoo lalais ba ministeriu ka organizasaun neebe toma konta atu bele hetan mos sansaun, lei iha ona, maibe falta de kontrolu.
Josefa hatete, dala barak trabalhadores sira labrani atu hatoo keisa, tanba tauk atu hasai, i hasai sira susar atu sustenta família, tanba nee sira oferese aan deit maske moras ka situasaun saida deit sira lapermite atu halao servisu maibe obriga aan deit tanba tauk atu hasai.
Neebe presiza atu konsensializa populasaun sira atu hatene kona ba lei neebe mak iha nunee bele hatene katak regras iha atu kontrolu, bainhira kompania utiliza sira hanesan trabalhadores maibe tenke hatene katak labele viola direitu trabalhadores sira.
Nunee mos Xefi Bankada CNRT Duarte Nunes hatete, ohin loron espesial ba trabalhadores sira, nee komemora kleur ona kada tinan, neebe tempu ba tempu sira nia moris bele iha atensaun espesial ba trabalhadores sira.
Nia katak, tinan_tinan sira halo demonstrasaun pasifika hodi fo hanoin ba governu atu labele haluha sira, liu_liu ba sira nia salariu minimu.
Atu nunee kompania ka governu bele tau atensaun maximu ba sira hodi bele hadia sira nia direitu ba salariu.
“Dala ruma sira nia direitu viola hela, tuir loos nee trabalhadores sira tenke ba keisa karik hetan violasaun”, katak Duarte.
Nia hatete, kompania ka governu, ka se deit mak fo servisu ba ema tenke buka dignifika trabalhadores sira nia direitu.
Tuir nia, nasaun nee balu lahanesan, hanesan iha Timor_Leste dala ruma ema balu tenta explora direitu trabalhadores sira nian, tanba nee presiza atensaun atu nunee labele viola direitu trabalhadores sira, tanba hotu_hotu mesak hanesan umanu, maske bele fo servisu ba ema maibe presiza respeita no dignifika trabalhadores.
(gui)
