DILI, STLNEWS.co – Ministeriu Asuntu Kombatentes Libertasaun Nasional (MAKLN) ho ekipa halo verifikasaun validasaun dadus 2009 neebe falta 25%, sei hahu iha loron 28 fulan Setembru tinan 2023, iha Munisipiu 13 inklui RAEOA. Total rejistu 124.782, verifika ona 93.946 no sei falta 30.836.
Ministru Asuntu Kombatentes Libertasaun Nasional, Gil da Costa “Oan Soru” ba jornalista iha nia knaar fatin Komoro Kinta (21/09/2023) hatete, ohin loron 21 fulan Setembru lori MACLN ho CLN hatoo ba iha publiku no iha Timor laran tomak nomos ba konselhu Munisipais hotu neebe mak agora dadaun iha idak idak nia fatin no ekipa tomak katak, verifikasaun dadus 2009 sei hahu iha 28 fulan Setembru 2023.
“Fo sai ba iha publiku katak validasaun dadus 2009 ohin sei falta 25% mak ita seidauk halo verifikasaun para atu konklui, dadus total neebe mak ami babain fo sai no fo sai bebeik ohin fo sai tan husi total rejistu mak rihun 124.782, verifika tiha ona 93.946 sei falta 30.836, nee vale ba 25%,” katak nia.
Nia hatutan, halo verifikasaun nee lidera no komanda direita husi MACLN no CCLN, hahu husi Nasional too iha Munisipiu no suku no responsabliza husi tekniku baze de dadus.
“Husu hotu hotu kontribui no partisipa hahu iha loron 28 fulan Setembru tinan 2023 no hahu ohin ekipa lori lista ba taka iha teritoriu Timor laran tomak, orariu ka kalendariu taka iha fatin tomak no husu ba sira neebe mak sei partense hela ba 25% neebe seidauk verifika favor ida marka prezensa iha fatin neebe mak ekipa indika iha postu hotu iha teritoriu tomak,” katak nia.
Oan Soru mos husu ba sira neebe mak durante nee verifika tiha ona, husu lalika ba tan, tanba ba soe tempu deit. Tanba verifikasaun nee ba los deit ida neebe mak seidauk verifika.
Iha fatin hanesan Prezidente CCLN, Vidal de Jesus Riak Leman husu ekipa neebe mak tun halo verifika diak liu kumpri tuir saida mak ministeriu hatoo ona no tuir regra.
“Husu ekipa sira ba servisu tuir regra neebe mak ministeriu iha, husu servisu tuir oras nee mak iha, no kumpri regra iha terenu,” katak nia.
(eme)
