DILI, STLNEWS.co – Deputadu sira iha Parlamentu Nasional (PN) husu nafatin governu buka tuir restus mortais eroi Timor-Leste, neebe too oras nee seidauk hetan.
Lia hirak nee hatoo husi Visi Bankada FRETILIN, David Dias Mandati katak, restus mortais eroi sira neebe seidauk hetan, governu tenki buka ona, nunee bele hetan.
“Ita nia ema sira neebe lakon too agora la hetan sira nia restus mortais, ita tenki buka tuir kedas ita nia maluk funu sira neebe agora sei iha. Se lae aban bairua sira mate hotu, ita husu fali sira jerasaun foun la hatene,” ezije Deputadu FRETILIN, David Dias Mandati iha plenaria Parlamentu Nasional (PN), Tersa nee (29/08/2023).
Nia kestiona, se labuka tuir, agora loron ruma maluk funu sira, liu-liu kapitaun, sira nee mate hotu, ba buka fali sira sei la hatene, tanba nee husu took ba sira neebe mak sei moris.
“Ita laos atu akuza sira, maibe aproveita sei moris ita husu, ita husu took ba sira, nunee bele buka tuir restus mortais sira”, tenik nia.
Entretantu, Visi Ministru Asuntu Parlamentares, Aderito Hugo katak, relasiona ho asuntu nee nia parte rezista, no enkamina ba ministeriu relevante atu haree ba kestaun hirak neebe deputadu sira foti.
Observasaun STL haree katak, ezijénsia Deputadu Mandati nian ba buka tuir restus mortais nee laos foin ohin, maibe dezde mandatu III Lejilatura nia preokupa atu buka tuir, mai too IV Lejislatura, V Lejislatura, too VI Lejislatura, nia kontinua ezije atu buka tuir restus mortais eroi sira neebe seidauk hetan.
(gui)
