DILI, STLNEWS.co – Durante tinan barak nia laran Timor Leste depende makaas ba fos importasaun husi rai liur, tanba nee Ministru Agrikuktura promete, durante mandatu tinan 5 sei hasae produsaun rai laran, no redus fos importasaun husi rai liur.
“Durante tinan barak nia laran ita depende makaas ba fos importasaun husi rai liur, tanba nee ba oin ita sei servisu makaas liu tan, hodi halo redusaun ba fos importasaun husi rai liur,” dehan Ministru Agrikultura no Peska (MAP), Marcus da Crus ba jornalista sira iha MAP, Segunda nee (03/07/2023).
Nia afirma, rai bokur barak mak too agora sei husik abandona hela, no bee estraga deit halo duut mak buras iha fatin-fatin, tanba nee ba oin tenki servisu koopera ho povu agrikultor iha baze hodi hasae produsaun. Se lae mak osan semo hotu ba rai liur, tanba produtu hotu hotu nee mai husi ema nia nasaun deit.
Iha fatin hanesan, Ministru sesante Pedro dos Reis hateten, atu hasae produsaun rai laran mak ekipamentu sira neebe aat ona nee tenki hadia.
“Durante ami nia mandatu la konsege hadia ekipamentus, hanesan traktor no hand traktor, tanba orsamentu laiha, no atu hasae produsaun orsamentu mai iha ministeriu tenki boot,” dehan Eis Ministru nee.
Nia afirma, durante nia mandatu konsege dezenvolve ona natar iha munisipiu sira neebe potensial, hanesan Maliana, Alas, Kovalima nomos munisipiu seluk, tan nee atu redus importasaun mak governu tenki servisu makaas, no aloka osan mai iha ministeriu mos tenki boot.
(mad)
