Mean Manan Metin Iha Ponta Leste

LOSPALOS, STLNEWS.co Partidu FRETILIN alias mean sei manan metin iha Ponta Leste 1, tanba entuziasmu kuadru, militante no simpatizante sira neebe hafutar kampu futebol Lospalos hodi partisipa kampanha FRETILIN nian iha neeba.

Haree ba antuziasmu povu neebe fila hikas ba uma knua FRETILIN, mean fiar aan manan metin iha eleisaun Parlamentar tinan ida nee, tanba ho razaun eleisaun dala hira ona neebe realiza iha tinan 2002, 2007,20012,2017 no 2018 (Eleisaun Antisipada) laiha partidu ida mak manan FRETILIN iha Ponta Leste 1  ho votu neebe barak.

Ho nunee  mak Koordenador Partidu FRETILIN Munisipiu Lospalos, Aurelio Freitas garante ba militante no simpatizante sira katak, FRETILIN sei manan barak liu ka absoluta iha Lospalos, tanba haree ba antuziasmu, kuadru, militante no simpatizante sira nian hodi pinta  kampu futebol Lospalos neebe antes nee ho koor matak depois nakfilak sai mean total.

 “Hau fiar FRETILIN sei manan barak liu ka absoluta iha Munisipiu Lautem, tanba razaun mak prezensa Kamarada sira nian iha nee, neebe diferente ho sira seluk nia kampanha iha fatin ida nee,”dehan Aurelio iha ambitu kampanha FRETILIN nian, iha Munisipiu Lospalos, Domingu (14/05/2023).

Maibe nia dehan, uluk ho liderensa koordendor deit FRETILIN manan nafatin iha Lospalos, sa tan  agora hamutuk ho lideransa Lere Anan Timor, ho lideransa sira husi rejiaun un, dois, tres no kuatru FRETILIN  sei manan boot liu tan. Tanba FRETILIN ba viabiliza governu da-8 iha tinan rua ho balu deit fo ona rezultadu neebe diak ba povu.

“Povu senti ona sai mak FRETILIN halo bainhira ba viabiliza governu da-8, tanba nee FRETILIN tama on a ba sira ida idak nia fuan hodi bele  vota ba FRETILIN iha 21 Maiu agora,”hatete nia.

Iha fatin hanesan Lideransa Troika,Lere Anan Timor hatete, FRETILIN mak hahoris bandeira nasional no hahoris RDTL.” Kamiza mean neebe ohin imi hatais bandeira mean neebe ita hasae, laos hanesan bandeira sira husi partidu sira seluk, nee partidu lulik tanba reprezenta ran no isin saudozu sira neebe mate ona, tanba bandeira nee laiha ita la ukun aan,” hatete Lere.

Nia hatutan, FRETILIN nia papel no misaun mak serbi povu no nasaun, hodi lori moris diak ba ema hotu iha rai ida nee. “FRETILIN hahu funu iha ona komprimisiu ho povu, komprimisiu nee mak liberta ita nia povu husi kolonializmu, atu povu bele moris ho dignu,” katak Liderenasa Troika nee.

(car)

LEAVE A REPLY

Please enter your comment!
Please enter your name here