Militante FRETILIN 2.500 Hatama Ona Petisaun Ba CCF

DILI, STLNEWS.co – Militante husi Partidu FRETILIN hamutuk 2.500 hatoo petisaun ba iha Komite Sentral FRETILIN (CCF – sigla portugues), husu atu halo kongresu nasional estraordináriu no halo eleisaun direita ba Prezidente Partidu Francisco Guterres Lu Olo ho Sekretariu Jeral Partidu Mari Bin Amudi Alkatiri iha tempu badak.

Iha biban nee, portavos petisionariu militante FRETILIN, Jose Agostinho Siquera Somotxo liu husi konferensia iha salaun CCF Kuarta nee (31/01/2024) hatete, petisionariu maioria husu atu halo kongresu nasional estraordináriu, tanba konsidera estrutura atual la hatudu dezempenhu diak.

Petisaun militante no kuadru FRETILIN neebe asina dokumentus ida nee ho baze ba direitu atu livremente ninia opiniaun ba respetiva ba orgaun sira kritika opinaun, proposta konaba organizasaun FRETILIN nia, iha alinea D artigu 13 estatutu da FRETILIN hakarak hatoo petisaun ba kamarada prezidente, kamarada Sekretariu Jeral ho konteúdu hanesan tuir mai.

“Ho neon nakraik laran susar ami lamenta tebes rezultadu eleisaun parlamentar 21 Maiu 2023 neebe hatudu katak FRETILIN lakon ka ho liafuan seluk hetan derota eleitoral ida neebe aat liu iha istoria post restaura independensia neebe halo militante no kuadru barak ninia fuan moras, no lakon liu tan esperensa ba lideransa atual ninia kapasidade atu lori partidu istiriku nee ba vitoria eleitoral iha eleisaun sira tuir mai,” katak nia.

Nia hatutan, sira mos nota katak husi votus ho porsetajen 57,37% ho 55 kadeira iha asembleia konstituante neebe FRETILIN hetan iha eleisaun 2021, tanba meritu istoriku husi prosesu libertasaun patria iha sorin ida maski numeru eleitoral iha Timor Leste aumenta.

Durante lideransa neebe lidera husi Prezidente Partidu Francisco Guterres Lu Olo ho Sekretariu Jeral Partidu halo kadeira tun hela deit iha tinan 20 nia laran nunka rekupera, ba fali rezultadu neebe hetan iha eleisaun 2001 aat liu tan tun too 25,75% ho ekivalente deit 19 kadeira iha eleisaun 21 Maiu 2023, bele haree iha dadus eleisaun parlamentar husi 2001 too 2023.

Iha sorin seluk, ho lideransa Prezidente Partidu no Sekretariu Jeral nia mandatu bainhira FRETILIN manan mos la ukun, ka ukun tiha mos adversariu politiku sira hamonu hikas hanesan iha eleisaun 2007 no eleisaun 2017 bainhira lakon halo insidente parlamentar no viabliza hanesan eleisaun iha 2012 ho 2018, hafoin maski viabliza tiha mos bainhira ba eleisaun lakon aat liu tan hanesan iha eleisaun parlamentar 2023, aat liu tan Munisipiu Baukau, Vikeke no Lautem neebe tradisional FRETILIN sempre manan ho minimu 50%, iha eleisaun 21 Maiu 2023 hetan redusaun votus entre 8 too 16 kompara ho eleisaun antisipada 2018.

Nia hatutan, haree derota neebe iha sira ezije ba Prezidente Partidu Francisco Guterres Lu Olo ho Sekretariu Jeral Partidu Mari Alkatiri atu asumi responsablidade ba derota hirak neebe temi ona iha leten hodi renunsia sira nia mandatu, respetivamente nudar prezidente ho Sekretariu Jeral.

Somotxo haktuir tan, dalan los atu evita FRETILIN nia derota iha eleisaun sira tuir mai mak halo renovasaun ba lideransa FRETILIN hodi prepara vitoria iha eleisaun iha futuru hodi eleisaun munisipais neebe tuir Governu atual nia programa sei halao iha 2025 no 2026 no eleisaun Prezidensial 2027 no eleisaun parlamentar 2028.

Nunee mos militante FRETILIN Rui Maria de Aroujo hatete, ohin halo konferensia imprensa ida nee momentu ida neebe iha militante kuadru balun husi Partidu FRETILIN nia halo petisaun ida ba lideransa partidu ho mos membru komite sentral.

Relasiona ho petisaun nee, STL koko atu halo konformasaun ba iha Prezidente Partidu FRETILIN nomos Sekretariu Jeral Partidu iha CCF maibe laiha fatin.

(eme)

LEAVE A REPLY

Please enter your comment!
Please enter your name here