DILI, STLNEWS.co – Primeiru Ministru Kay Rala Xanana Gusmão halao enkontru ho Ministeriu Justisa (MJ), Ministériu Defeza (MD), Ministeriu Interior (MI) no Servisu Nasional Informasaun (SNI), koalia konaba Orsamentu Jeral Estadu 2024 no prioridade ba atividade importante.
Tuir Ministru Interior Francisco Guterres katak, ohin sira enkontru ho PM, hodi haree ba orsamentu konaba instituisaun neebe tutela direta ba PM, hanesan Defeza, Justisa, Interior ho SNI.
“Ami koalia oituan ba planu asaun anual 2024 nian, i ami mos koalia konaba orsamentu 2024 nian ba ministeriu no instituisaun hotu, oinsa bele asegura kontinua servisu ba estadu”, informa Ministru Interior Francisco Guterres ba jornalista, Sesta (15/09/2023) iha Palasiu Governu.
Nia dehan, koalia ba osan nee, atu hodi haree planu saida presiza halo, hanesan infraestrutura, ekipamentus, konaba rekrutamentu polisia ba tinan oin.
Nia informa, planu preoridade MI nian ba 2024, re-estrutura MI rasik, tanba dekretu lei no lei organika promulga ona husi Prezidente.
Tanba nee re-estrutrutura MI nee hodi hamosu tan diresaun jeral hodi haree ba problema, seguransa ridaviaria rasik, nunee mos kona ba edukasaun sivika atu mentaliza joven sira, labele halo problema, maibe hanoin ba sentidu estadu no servisu, respeita malu, halo dialogu karik iha problema, labele uza violensia, nunee bele kontribui ba paz no estabilidade.
Tuir mai kona ba polisia re-organiza fali, tanba nee tenki hadia fali sira nia kbiit, hanesan investigasaun Kriminal, hodi hasae kapasidade investigasaun, eleva estatutu ba diresaun ida, atu sira nia kobertura servisu diak liu.
Nunee mos tenki hadia fronteira, imigrasaun no hasae kapasidade kontrolu.
Tuir nia, konaba montante orsamentu MI ba 2024, seidauk koalia montante, tanba sei haree lai ba atividade atu halo depois hamosu fali tetu.
Tanba montante orsamentu nee mos sei hein husi Ministeriu Finansas (MF), hatoo envelope fiskal mak bele ajusta tuir planu ba atividade sira.
Entretantu, Xefi do Governu Kay Rala Xanana Gusmão hatete, husu atu ministériu sira halo planu ho diak, i haree uluk prioridade neebe urjente, no importante.
Tuir PM Xanana katak, buat neebe importante mak atu haree ba Polisia, Imigrasaun, Seguransa Sivil, prevensaun konflitus, tanba nee husu atu haree hodi rezolve problema interna, hasae kapasidade hodi halao servisu ho diak.
Tanba nee, Xefi Ezekutivu husu atu do preoridade ba neebe importante, labele halo buat hotu dala ida, tanba halao buat hotu tuir kbiit orsamentu, i halao fazeadamentu kada tinan too tinan 5.
(gui)
