Ministru Defeza Australia Hasoru PM Xanana, Hametin Relasaun

DILI, STLNEWS.co – Ministru ba Dezenvolvimentu Internasional no Pasifiku, i Ministru Defeza Industria Australia halao vizita mai Timor-Leste no hasoru Primeiru Ministru Kay Rala Xanana Gusmao, hodi hametin parseiru nudar nasaun vizinhu ba tempu naruk.

Hasoru malu entre Primeiru Ministru Xanana Gusmao ho Ministru Defeza Industria Australia nee, iha Palasiu Governu, Gabinete Fronteira Maritima, Segunda (29/01/2024), hodi hametin liu tan amizade entre nasaun rua, neebe sustenta husi ligasaun istoriku no kultura neebe klean.

Ministru ba Dezenvolvimentu Internasional no Pasifiku, i Ministru Defeza Industria Australia, Hon Pat Conroy, bainhira halao enkontru ho PM Xanana, nudar mos figura senior iha Governu TL, hodi reforsa kompromisu Australia nian ba dezenvolvimentu ekonomiku no umanu TL, seguransa, preparasaun ba dezastre no prioridade mobilidade trabalhador nian.

Ministru Conroy mos apoia tan fundus hodi suporta servisu polisia neebe kualifikadu no profisioal iha TL, liu husi Programa Dezenvolvimetu Polisia Timor-Leste (TLPDP). Ho orsamentu tokon AU$ 35, sei estende parseria polisia neebe susesu entre Polisia Federal Australia no Polisia Nasional Timor-Leste (PNTL) ba tinan 5 tan.

Aleinde nee Ministru Defeza Australia nee mos anunsia programa foun, hodi apoia ba trabalhador Timor oan neebe partisipa iha eskema Mobilidade Trabalhu Pasifiku Australia (PALM). Servisu parseria hamutuk ho Governu TL, kompromisu tokon AU$ 4, ida nee sei fornese apoia sosial no reintegrasaun adisioal hodi maximiza benefisiu neebe sei kontinua ba partisipasaun trabalhador Timor oan sira iha eskema PALM.

Entretantu PALM fornese empregu, oportunidade no rendimentu ba TL nia trabalhador sira, no trabalhador Timor oan hamutuk ema 4.500 oras nee servisu hela iha Australia, iha eskema PALM, ho remisaun sira daudaun nee sai hanesan kontribuisaun segundu boot liu ba TL nia produtu domestiku bruto hafoin mina-rai no gas.

Laos nee deit, governante Australia nee mos anunsia ona tokon AU$ 1.58 hodi ajuda TL prepara no responde ba impaktu sedu husi El Nino, ida nee parte husi pakote apoia tokon AU$ 5, neebe fornese ba TL ho pasifiku.

Tanba nee, Australia nafatin sai nudar TL nia parseiru dezenvolvimentu no seguransa boot liu, no sei kontribui ba estimativa tokon AU$ 118 iha asistensia dezenvolvimentu iha 2024.

(gui)

LEAVE A REPLY

Please enter your comment!
Please enter your name here