DILI, STLNEWS.co – Ministru Justisa desloka ba nasaun Finlandia hodi haree konaba asuntu pasaporte nian.
“Ohin desloka ba Finlandia liu husi Bali, aban dader foin aranka ba Finlandia, atu ba haree aprovasaun final sira, depois ita bele halo asinatura ikus, atu fo biban ba kompanhia produtor sira bele halo ona produsaun,” dehan Ministru Justisa Amandio Benevides ba jornalista sira iha Aeroportu Nicolau Lobato, Sabadu (05/08/2023).
Ministru Justisa hatutan, atu halo produsaun sei haree faze por faze hodi halo sai livru, tanba nee hein oituan Ministru Justisa sei koalia ho kompanhia atu hakas aan, nunee iha fulan Setembru nee ita bele hetan pasaporte.
Nia esplika, produsaun ida agora bazeia ba orsamentu ida nee tau kedan iha tinan hirak liu ba nee US$ 202 mil atu sosa kaderneta 16 mil. Maibe foin lalais iha ratifikativu aprova tan, tanba 16 mil la to aumenta tan pasaporte 60 mil ital atu bele responde ba nesesidade neebe difisil tebes iha ita nia rai laran.
Nia afirma, tipu pasaporte komun, servisu, estranjeiru nomos pasaporte diplomatiku.
Iha fatin ketak, Akademiku UNTL Mario Nunes dehan, durante nee ema hotu preokupa ho kestaun nee, tanba nee husu Ministru Justisa atu buka solusaun lalais ba kestaun nee.
“Husu Ministru Justisa atu buka solusaun lalais ba kestaun nee, tanba durante nee ema hotu prekupa hela konaba kestaun nee,” dehan nia.
Nia hatutan, problema pasaporte halo pasiente balu labele desloka ba rai liur, tanba nee husu Ministru Justisa atu tau atensaun seriu ba kestaun pasaporte.
(ter)
