DILI, STLNEWS.co – Ministra Negosiu Estranjeiru no Kooperasaun (MNEK), Adaljiza Magno, husu Timor oan sira neebe oras nee buka moris iha Inglatera atu hadook aan husi problema, tanba iha nasaun refere lei rigorozu tebes.
Kestaun nee governante hatoo relasiona ho video neebe sirkula iha media sosial liu-liu iha Facebook, Konaba Timor oan sira ataka malu iha Inglatera loron hirak liu ba.
“Tamba nee, hau husu ba Timor oan sira iha neeba atu hatun nervozu no kria unidade, tanba objetivu Timor oan sira ba iha Inglaterra atu buka osan, laos ba kria problema,” dehan MNEK, Adaljiza Magno, ba jornalista sira hafoin remata audiensia ho Xefi Governu iha rezidensia ofisial Farol, Kinta nee (28/09/2022).
Nia dehan, lei iha nasaun refere rigorozu tebes, bainhira kaptura Timor oan sira neebe ataka malu, mak posibilidade sei aprezenta ba iha tribunal hodi tuir prosesu neebe nasaun neeba iha.
“Ita apela ba Timor oan sira neebe daudaun nee servisu iha Inglatera atu labele ataka malu, tanba ema nia lei nee rigorozu tebes, se mak halo krimi kaer submete ba tribunal, bele tama kadeia,” tenik governante nee.
Nia hatutan, Timor oan sira neebe oras nee servisu iha Inglatera pur volta rihun 15 ou rihun 20, maibe ida neebe rejistadu iha embaixada nee pur volta rihun 5 ga 6 deit.
(alb)
