DILI, STLNEWS.co – Ministeriu Negosiu Estranjeiru no Kooperasaun (MNEK) hamutuk ho Komisaun Funsaun Publiku (KFP) sei halo rekrutamentu kuadru tekniku sira, hodi haree konaba Timor Leste nia adezaun ba ASEAN.
Lia hirak nee hatoo husi Ministru Negosiu Estranjeiru no Kooperasaun MNEK, Bendito Freitas ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite, Sesta (11/08/2023).
Ministru hatete, koalia ho prezidente konaba preparasaun Timor Leste nia adezaun ba ASEAN, liu-liu aspetu rekrutamentu kuadru tekniku sira kooperasaun ho KFP atu haree kuadru sira neebe presiza atu halo rekruta, atu bele rekruta funsionariu sira neebe iha linha ministerial, kuadru sira kompotente atu prepara daudaun ona atu tuir formasaun ligadu konaba Roadmap nia, ligadu ba ASEAN nia.
Segundu rona ideas husi prezidente konaba dezafiu ba politiku global, nomos Ministeriu Negosiu Estranjeiru nia papel iha politika, diplomasia atu hametin relasaun kooperasaun no multilateral atu bele lori vantajen ba pais.
Nia afirma, TL nia prepapasaun neste momentu iha renunsiu intensivu neebe halao tekniku iha nivel som nia. Neste momentu IX Governu Konstitusional iha kedas membru governu ida dezignadamente foka ba ASEAN nia mak Visi Ministra MNE ba asuntu ASEAN nia. Importante tebes atu haree ba situasaun ida nee liu-liu ba kuadru preparativu atu bele partisipa iha kursu formasaun liu-liu ba prinsipais tolu neebe hola parte iha ASEAN iha futuru.
“Rekruta ita hahu uluk 280 funsionariu depois ita prepara tan, prezidente fo hanoin ida, karik buka hatene liu ita halo investe barak liu dezenvolvimentu kapital humanu ba formasaun tekniku, Timor oan barak kursu iha liur sira hetan ona tekniku profesional depois mai servisu iha neebe, entaun presiza buka dadus sira hatene hodi haree sira nia kompetensia sira nee tau iha neebe, partisipa iha preparasaun ASEAN nia,” katak ministru.
Nunee mos Prezidente KFP, Faustino Cardoso Gomes hatutan, Timor Leste agora iha hela preparativu konaba adezaun ba ASEAN, atu sai full membru neebe prosesu ida ke naruk.
“Karik imi akompanha prezidente nia diskursu horiseik klaru katak, hahu kedas 2012 Timor Leste prepara no husu atu sai full membru, horiseik mos Prezidente Republika hatete ona 2025 mak bele tama, signifika agora ita seidauk prepara lo-loos liu-liu rekursu humanu, ita nia situasaun funsasaun publiku atual sei iha limitasaun sira balun sei la prontu atu tama full membru ASEAN nia, iha pilar sosial ekonomi, seguransa,” katak nia.
Nia hatutan, durante nee funsaun publiku buka servisu hamutuk ho Ministeriu Negosiu Estranjeiru no Kooperasaun no Visi oinsa buka halo rekrutamentu.
Nia Informa, rekruta iha area neebe nee Ministeriu Negosiu Estranjeiru mak hatene muito bem, maibe klaru katak rekrutamentu iha area agrikultura, Edukasaun, nomos Komisaun Funsaun Publiku nia rasik, no iha area ekonomia mak iha ministeriu Komersiu Industria rasik, no ministeriu neebe mak relevante prosesu sira lao, mudansa VIII Governu ba IX Governu entaun sei halo hela prosesu balun hodi haree prioridade governu nia balun oinsa konklui ho organika ministeriu balun ho orsamentu ratifikativu.
Iha enkontru nee, Prezidente Republika Jose Ramos Horta hatete, presiza haree didiak konaba rekrutamentu nee, no tuir prezidente katak husi enkontru neebe nia halo ho Primeiru Ministru Kay Rala Xanana Gusmao katak, oras nee Timor-Leste sei prienxe rekezitu sira tuir Roteiru hotu no TL tama ASEAN iha 2025.
(eme)
