DILI, STLNEWS.co – Relasiona ho akontesimentu iha Munisipiu Ermera hamosu udan boot no estrada kotu, entaun labele halo evakuasaun ba inan isin rua no too ikus bebe mate. Ho ida nee, bainhira estrada aat Ministeriu Obras Publika (MOP) iha obrigasaun atu hadia estrada no Ministeriu Saude (MS) iha modalidade oinsa para bele evakua pasiente.
Kestaun nee hatoo husi Ministra Saude, Odete Maria Freitas Belo ba jornalista sira iha Palasiu Governu, Tersa nee (28/03/2023).
“Maski ita nia postu saude sira neebe mak agora daudaun koloka iha area rural sira nee kuaze estrada sira tama hotu ona, maibe tanba dezastre naturais, hanesan iha Ermera nee ita labele koalia, tanba bainhira ambulansia ba foti mos presiza atu asesu ba iha estrada neebe mak diak, MS servisu ho ministeriu sira seluk liu-liu MOP hatene ona katak, estrada aat sira iha obrigasaun atu hadia estrada sira neebe mak iha, agora MS ita iha modalidade oinsa para atu bele evakua ita nia pasiente sira,” dehan nia.
Nia hatutan, MS koloka mos mediku no infermeiru sira iha neeba, infelizmente dala ruma koloka tiha infraestutura sira iha neeba.
Nia hatutan, mediku no parteira sira mos kontinua destaka iha fasilidade saude sira, maibe depende ba inan isin rua, iha tempu nia partus nee nia laiha risku ruma ka lae, inan sira neebe mak partus nee inan balun diak hela, maibe inan balun kous ho risku neebe mak aas, nee signifika katak, inan isin rua sira mai ho hipertensaun, entaun bele fo risku ba inan isin rua.
Iha fatin ketak, tuir Deputadu Bankada KHUNTO, Antonio Verdial hatete, iha semana kotuk husu ona ba governu atu tau matan ba kondisaun dalan neebe kotu iha Munisipiu Ermera, neebe kotu iha fatin rua, iha parte Letefoho nian, maibe iha realidade Sabadu, bainhira ho visi ministra atu desloka ba Atsabe, maibe labele liu no liu husi dalan alternativa mos labele liu nafatin.
“Ita la tau matan ba iha kondisaun estrada mak rezulta labarik ida neebe inan kous, depois ninia oan moris iha dalan i kareta mos labele ba, nia rezultadu mak ninia oan nee mate,” tenik nia.
(nat)
