DILI, STLNEWS.co – Ministeriu Obras Publik (MOP) sei tau prioridade ba infraestrutura neebe grave, area urbana iha territoriu laran ba tinan oin, enkuantu ba hirak neebe hetan estragus husi kalamidade, sei haree emerjensia.
Ministru Obras Publik (MOP), Samuel Marçal hatete, tinan oin MOP sei nafatin prioridade ba infraestrutura, nunee mos ba fatin sira neebe konsidera urjensia, dalan urbana neebe grave, presiza tau atensaun.
“Munisipiu neebe atu prioridade, governu iha ona kontratu hanesan Maliana, Ermera, Vikeke no munisipiu seluk sei iha levantamentu de dadus, ita sei tau konsiderasaun ba tinan oin”, informa Samuel Marçal ba jornalista sira iha Palasiu Governu, Kuarta (27/09/2023).
Nia dehan, konaba orsamentu sei haree, hodi bele hahu prosesu aprovizionamentu ba tinan oin.
Iha parte seluk, Deputadu husi Bankada FRETILIN Antoninho Sarmento husu ba governu liu husi MOP, atu atensaun ba estrada sira neebe kondisaun aat iha reritoriu laran.
Estrada neebe aat, nee difikulta tebes movimentu transporte publiku no privadu, liu-liu ba komunidade agrikultor sira, hanesan iha Manufahi, iha Alas nian, mai Betanu, Belaluhu, komunidade agrikultor difisil transporta sira nia produtu, tanba nee presiza tebes hetan atensaun.
Tuir nia, laos nee deit, maibe iha Munisipiu Manufahi iha estrada no ponte lubuk mak foin daudaun hetan estragus husi kalamidade, tanba nee tenki atensaun emerjensia, nunee tempu udan labele aat.
Tanba se la atensaun tempu udan boot sei estragus liu tan.
Entretantu, Deputadu CNRT, Natalino dos Santos hatete, Koalia ba kondisaun estrada no ponte neebe aat iha teritoriu laran, hau fiar katak IX Governu liu husi MOP sei atensaun”, katak nia.
Tanba tuir nia, programa IX Governu fo mos prioridade ba infraestrutura, tanba nee fiar katak governu iha planu atu reabilita no halo estrada sira neebe hetan estragus.
(gui)
