Movimentu Forsa Trabalhadores Prontu Apoiu Votus Ba PD

DILI, STLNEWS.co – Movimentu Forsa Trabalhadores Timor Leste prontu apoiu votus ba Partidu Demokratiku (PD) iha eleisaun parlamentar tinan nee.

Tuir Prezidente Movimentu Forsa Trabalhadores Timor Leste, Almeiro Vila Nova hatete, estabelese movimentu forsa trabalhadores Timor Leste neebe mak sai hanesan organizasaun liras husi organizasaun konfederasaun sindikatu Timor Leste, ho objetivu atu bele akumula forsa trablhadores nian hotu-hotu iha Timor Leste, hodi hasoru eventu politika ida nee daudaun.

“Hanesan ita hatene katak, luta trabalhadores nia nee laos luta ba deit iha aspetu ekonomia, maibe mos ba iha aspetu politika,” dehan nia ba jornalista sira iha iha Sede KSTL, Bemori, Dili, Sabadu nee (25/03/2023).

Nia dehan, movimentu ida nee foti asaun koletivu hodi mobiliza forsa trabalhador sira hotu-hotu iha Timor Leste, atu bele fo apoiu ba partidu demokaratiku.

Nia hatete, tanba movimentu forsa trabalhadores halo plataforma politiku estabelese ona akordu politika ho PD, nunee movimentu forsa trabalhadores sei fo apoiu tomak ba iha Partidu Demokratiku.

Nia dehan, koalia konaba aspetu politika ligadu ho lei sira, lei nee ema politika nain mak halo, parlamentu sira mak halo, tanba nee mak politika nee tenki sai hanesan preokupasaun trablhadores nian, tanba durante nee ladun tau importasia ba iha kestaun politika, la aproveita oportunidade sira iha eventu politika sira, nunee bainhira partidu sira neebe mak ba ukun, durante nee ladun fo prioridade no importante ba iha intrese trabalhadores nian.

Nia hatete, ezemplu hanesan salariu minimu tinan sanulu nia laran laiha mudansa ba ida nee, hatene katak governu hira mak troka ba mai ona, maibe problema nee nafatin inklui mos problema lejizlasaun sira lubuk ida neebe mak sidauk hetan ninia aprovasaun iha parlamentu, tanba nee maka liu husi dalan politiku ida nee.

Iha sorin seluk, Visi Prezidente Partidu Demokratiku, Adriano Nascimento “Loro Mau” hatete, memorandum de intendementu ida nee nudar esperansa no konfiansa, maibe kestaun sira atu ezerse sira nia votu nee buat ketak ida.

“Maibe importante ba ami hanesan lider PD mak sira hatur konfiansa no esperansa ba ami, para ami bele partilha sira nia luta atu dignifika trabalhadores Timor oan sira nian,” tenik nia.

Nia parte mos apresia no orgulhu, tanba movimentu ida nee bele tau konfiansa no esperansa hodi halo intendementu ida entre Partidu Demokratiku ho movimentu.

Nia hatete, nee kestaun ida neebe mak mais pertinente, tanba kestaun konfiansa no esperansa nee importante.

“Tanba ita tau esperansa ba malu para bele halo mudansa husi situasaun trabalhadores sira nian, nee importante,” dehan nia.

PD konsidera memorandum ida ohin nee responsabilidade para hatutan aspirasaun trabalhadores sira nian, hodi kria kondisaun neebe diak ba sira nia aan rasik.

(mar)

LEAVE A REPLY

Please enter your comment!
Please enter your name here