DILI, STLNEWS.co – Ohin Prezidente Republika (PR), José Ramos Horta, bolu Ministru Petroleum Minerais (MPM) hamutuk ho Autoridade Nasional Petroleum no Minerais (ANPM) no Timor GAP hasoru malu Xefi Estadu, tanba iha duvida balun liga ho progresu setor petroleum minerais, no Xefi Estadu husu liu-liu konaba dezenvolvementu greater sunrise.
“Iha sorumutu nee ami la koalia barak, maibe foka liu ba progresu oin nusa no diskusaun sira entre Governu Timor Leste ho Australia konaba dokumentu Petroleu Mining Code (PCM) no Product Sharing Contract (PSC), rejime fiskal inklui dokumentu sira seluk neebe oras nee parte rua dezenvolve hela inklui ho kalendariu ba dokumentu sira hotu neebe sei konklui iha fulan Novembru tinan 2022,” hatete Víctor da Conceição Soares, ba jornalista sira hafoin remata hasoru malu ho Prezidente Republika iha Palasiu Prezidensial Nicolau Lobato, Bairu Pite, Dili, Segunda nee (01/08/2022).
Vitor haktuir, Prezidente Republika ohin husu tuir situasaun sira nee, tanba nee ita informa katak, progresu sira no negosiasaun hotu lao diak no pozisaun Timor Leste nian klaru konaba oinsa kadoras nee ba iha neebe, konserteza durante nee publiku hatene katak kadoras sei mai Timor Leste no ida nee laos ho razaun politika deit.
Iha hasoru malu nee mos Ministru Petroleu hatete, sira esplika ona ba iha Xefi Estadu konaba pozisaun Timor Leste nian hodi dada kadoras mai Timor.
(cri)
