DILI, STLNEWS.co – Ministeriu Petroliu Rekursu no Minerais (MPRM) realiza workshop ho objetivu, halibur entidades hotu ministeriu nian, hodi fahe informasaun konaba vizaun no programa ba 2024.
Informasaun nee hatoo husi Ministru Petroliu Rekursu no Minarais, Francisco da Costa Monteiro ba jornalista sira iha Novu Turizmu, Kinta nee (12/10/2023).
Nia dehan, nee sesaun trabalhu no workshop ida, atu halibur entidades hotu-hotu iha Ministeriu Petroliu nian, diresaun no kargu xefia ho Prezidente Konselhu Administrasaun, entidades sira neebe tutela iha ministriu nian hanesan ANP, Timor Gap hodi bele fahe informasaun konaba vizaun Ministeriu nian, IX Governu Konstitusional nia programa prinsipal ba setor ida nee, no sub programa ou atividade neebe mak ministeriu trasa ba tinan 2024.
Maibe fo natain vizaun global objetivu prinsipais sentrais neebe mak ministeriu pasparte, IX Governu hakarak atinji iha tinan 5 oin mai.
“Ministriu nia objetivu prinsipal mak atu bele kontribui ativamente ba aumenta rendimentu ba nasaun, katak hatama osan ba nasaun kontribui makaas ba dezenvolvimentu sosiu ekonomiku ba ita nia nasaun, katak atividade no programas hotu-hotu neebe iha setor petroliu nian tenki kontribui ba kresimentu ekonomia, katak setor privadu tenki envolve makaas, ita nia povu sosiadade sira bele hetan benefisiu husi atividades hotu dezenvolvimentu petroliu no minarais iha ita nia nasaun nee,” dehan nia.
Governante nee haktuir, kontribuisaun hasae numeru ba empregu iha nasaun nee, tanba nee agora koalia hela programa, nunee orsamentu aloka bazeia ba programa neebe iha, tanba koalia uluk lai programa no atividades hotu tiha, depois halo mapamentu ba atividades sira nee nesesita osan sira, hodi nunee akumula ativamente mai, atu hatudu katak total ministeriu sei nesesita osan nee.
(joa)
