DILI, STLNEWS.co – Deputadu Bankada Governu konsidera programa prioridade neebe IX Governu iha, atu dada kadoras Greater Sunrise mai Timor Leste hanesan Naha todan ba Primeiru Ministru (PM) Kay Rala Xanana Gusmão.
Tuir Deputadu Bankada Partidu Demokratiku (PD), Maria da Silva katak, antes nee liu husi kampanha eleitoral, Partidu CNRT deklara ona katak bainhira povu fo fiar atu kaer ukun mak sei esforsu atu dada kadoras Greater Sunrise mai Timor Leste.
Tanba nee, bainhira povu fo fiar atu kaer ukun IX Governu tenki esforsu liu husi programa neebe governu iha atu dada kadoras mai Timor Leste.
“Naha boot neebe mak povu tau iha Primeiru Ministru nia kabas leten mak fo aan tomak liu husi governu neebe iha atu dada kadoras mai Timor Leste,” dehan Deputada Bankada Partidu Demokratiku (PD), Maria da Silva iha ambitu debate programa husi IX Governu iha PN, Kuarta nee (19/07/2023).
Deputada PD nee mos husu Primeiru Ministru, durante mandatu tinan 5 tenki rezolve mos problema hanesan Fronteira Maritima Aero no Terestre ho nasaun vijinhu Indonezia.
“Bainhira la rezolve problema sira nee, Primeiru Ministru sei tau hela sofrimentu ba jerasaun sira tuir mai,” dehan nia.
(Ekipa STL)
