Naimori Tebe Sai Olinda Husi Xefi Bankada

DILI, STLNEWS.co – Kestaun Saude, Konselheiru Partidu KHUNTO, Jose Naimori Bukar tebe sai Deputada Olinda Guterres husi Xefi Bankada KHUNTO iha Parlamentu Nasional.

“Primeiru hau hakarak koalia konaba halo mudansa ba ami nia estrutura bankada ninia nee, laos katak iha vingansa ruma, lae. Maibe ami haree ba ami nia Xefi Bankada, Dona Olinda kada vez moras, entaun ami substitui,” dehan Segundu Visi Bankada KHUNTO, Luis Roberto iha PN, Segunda (12/02/2024).

Nia hatutan, iha rejimentu Parlamentu Nasional fo dalan hodi troka Xefi Bankada, bainhira haree ba kestaun saude no seluk tan.

“Ami nain 5 tuur hamutuk hodi halo mudansa, la signifika katak atu hasai nee lae, atu halo mudansa deit para atu aselera servisu bankada nian liu-liu ajenda lider bankada no enkontru ruma iha nee. Maibe antes troka Xefi Bankada iha reuniaun, molok desidi Deputada Olinda Guterres la partisipa iha momentu neeba, entaun ikus mai konselheiru foti desizaun hodi troka,” haktuir nia.

Nunee Eis Xefi Bankada, Deputada Olinda Guterres hatete, la konkorda ho desizaun neebe Konselheiru Partidu KHUNTO foti hodi hasai nia husi Xefi Bankada KHUNTO neebe laiha koordenasaun.

“Tanba hafoin halao tratamentu saude iha estranjeiru no fila mai hetan kedas troka hau (Olinda) husi Xefi Bankada. Senor Naimori tau hau hanesan boneka, dudu hau ba karuk no dudu hau ba loos hau mai tuir, nia haruka hau nee atu halo saida, hau tenki halo tuir nia hakarak. No ikus mai hau dehan hau labele, orsamentu suvensaun neebe mai iha bankada tenki haruka ba konselheiru, tuir lei ida neebe mak bankada nia nee bankada nia, ida neebe partidu nia nee partidu nia,” lamenta nia.

Nia dehan, buat ruma neebe mak la loos, senhor Naimori tenki hatene katak, se mak harii partidu ida nee iha nomentu neeba, deklara partidu ida nee iha se nia uma.

“Ami deputadu sira iha PN sempre fo kada ema ida US$ 500.00 ba KHUNTO, uluk ami sei iha VIII Governu nia laran, kada ministeriu ida hatama US$ 1.500. Halo relatoriu neebe falsu tebes-tebes, neebe hau senti ba hau mos todan. Bele troka hau nudar Xefi Bankada, maibe tenki konsultasi ho hau, konsultasi ho deputadu sira neebe tuur iha parlamentu, laos Naimori halo karta diretamente ba Prezidente Parlamentu,” Kritika Olinda.

Aleinde nee, tuir karta neebe submete ba meza Parlamentu Nasional katak, asuntu subtituisaun no konstituisaun Xefi Bankada foun hakarak hatoo ba PPN katak, liu husi diliberasaun iha dia 08 Fevereiru 2024 maioria deputadu husi Bankada KHUNTO desidi hodi nomeia Xefi no Visi Bankada KHUNTO foun tuir balansu no politika neebe mak iha, desidi Deputadu Antonio Verdial de Souza ba Xefi Bankada KHUNTO foun, hodi troka Deputadu Olinda Guterres. No Primeiru Visi Bankada Antonio Verdial da Silva Ferreira, no Segundu Visi Bankada Luis Roberto da Silva.

(dom)

LEAVE A REPLY

Please enter your comment!
Please enter your name here