Nasaun Membru ASEAN Prontu Apoiu TL Adere Ba ASEAN

DILI, STLNEWS.co – Nasaun Membru ASEAN sira prontu apoiu Timor Leste nia preparasaun atu bele kumpri rekezitus neebe defini hodi adere ba ASEAN.

Lia hirak nee hatoo husi Ministru Negosiu Estranjeiru no Koperasaun (MNEK), Bendito Freitas ba jornalista sira iha Salaun VIP, Aeroportu Nicolao Lobato, Komoro, Dili, Domingu nee (16/07/2023).

Nia dehan, depois tomada de pose, IX Governu Konstituisional nia parte hetan konvite husi Ministra Negosiu Estranjeiru Indonezia hodi partisipa iha konferensia Ministrus ASEAN nian.

Nia haktuir, konaba partisipasaun iha reuniaun nee katak, hanesan segimentu ba konkordansia neebe iha Quadragésimo Primeira (dala 41) Simeira neebe halao iha Phnompan Kamboja, iha neeba Ministru ASEAN no lideres sira em prinsipiu admira Timor Leste nia kandidatura ba ASEAN.

“Klaru katak Timor Leste atu bele komesa hahu partisipa iha enkontru Ministrus ASEAN nian, nomos partilha ho Membrus Ministru Negosiu Estranjeiru ASEAN nian konaba asuntu sira neebe ligadu ba ASEAN,” tenik nia.

Nia akresenta, tanba nee mak ho autorizasaun husi Primeiru Ministru Kayrala Xanana Gusmão, hodi dezloka ba Jakarta atu tuir sekensia reunioens ba dala 56, Ministru Negosiu Estrangeiru ASEAN nian.

“Reuniaun nee rasik mos hanesan pontu da partida ida ba hau nia introdusaun dahuluk ba omologu sira ba Ministeriu Negosiu Estranjeiru ASEAN nian, nomos parseiru dialogu sira neebe mak barak mai husi país sira hanesan Australia, Canada, Japaun, Xina ho mos país lubuk ida neebe sira promete tebes-tebes atu fo apoiu ba Timor Leste, liu-liu ba Sekretariadu ASEAN nian,” tenik nia.

Membru governu nee haktuir, haree katak importansia rejiaun ASEAN nee nia sentralizmu importante tebes ba nesesidades globais, dezenvolvimentu ekonomiku, sosial, tanba nee mak país barak partisipa.

Timor Leste nia delegasaun husi MNEK hola parte iha neeba atu bele hatoo ideia no pensamentu iha forum enkontru ba ministrus refere.

(mar)