Natal & Tinan Foun Presiza Kria Pas-Estabilidade

DILI, STLNEWS.co – Selebrasaun natal no tinan foun, sidadaun hotu presiza kria pas no estabilidade, tanba Kosok Oan Jesus mai lori dame no domin ba ema hotu.

Lia hirak nee hatoo husi Deputadu Bankada CNRT, Natalino dos Santos katak, dezeju natal kmanek no ksolok ba povu Timor laran tomak, nomos dezeju tinan foun kmanek ba povu Timor-Leste laran tomak.

“Nudar reprezentante povu, hau husu atu kria pas estabilidade no dame iha ita nia rain, nunee fo biban ba ita nia ukun nain sira atu halao dezenvolvimentu iha TL, tanba ita nia rain sem pas no estabilidade, dezenvolvimentu mos sei la lao, tanba nee husu ba povu liu-liu juventude sira kria pas no estabilidade”, katak Deputadu CNRT, Natalino dos Santos ba STL via telefone, Tersa (26/12/2023) iha Dili.

Reprezentante povu nee hatete, natal Jesus mai lori ksolok no dame ba ema hotu, tanba nee nafatin husu sidadaun hotu atu mantein pas no estabilidade, tanba nudar sidadaun presiza tebes hotu-hotu nia kontribuisaun, tanba nasaun nee iha prosesu rekonstrusaun, i presiza ema hotu nia kontribuisaun, nunee dezenvolvimentu lao ho diak.

Tuir nia, nasaun iha pas no estabilidade, sei dada mos investor sira atu mai halo investimentu, tanba nee hotu-hotu tenki hanoin pas no estabilidade, tanba nee ho selebrasaun natal no tinan foun, liu-liu Jesus Kosok Oan mai lori dame no domin ba ema hotu atu hadomi malu.

(gui)

LEAVE A REPLY

Please enter your comment!
Please enter your name here