Observador Internasional CPLP 13 Sei Observa Eleisaun Parlamentar

DILI, STLNEWS.co – Observador Internasional husi Organizasaun Rede Orgaun Eleitoral (ROJAE) Comunidade País Língua Portugés (CPLP) hamutuk ema nain 13, sei halo observasaun ba eleisaun parlamentar neebe halao iha loron 21 Maiu.

Bainhira remata enkontru, Visi Prezidente Komisaun Nasional ba Eleisaun (CNE), Domingos Barreto ba jornalista sira iha Palasiu Prezidente Bairu Pite Kinta nee (18/05/2023) hatete, ohin Observador Internasional husi organizasaun ROJAE husi CPLP mai atu kumprimenta Prezidente Republika no rona mos lia menon husi Xefi Estadu konaba preparasaun eleisaun parlamentar neebe sei monu iha 21 Maiu.

Visi Prezidente hatutan, ekipa delegasaun nee foin too mai horiseik (17/5), neebe sira seidauk hatete buat barak, tanba sira foin primeiravez mai observa Timor Leste nia eleisaun parlamentar 21 Maiu.

“Delegasaun hamutuk 13 no sei fahe ba Postu Administrativu sira, sei koloka ema nain ida-ida,” informa Visi Prezidente CNE.

Nunee mos Observador Internasional ROJAE-CPLP husi Komisaun Nasional Eleisaun Kabu Verde, Cristina Leite hatutan, ohin Observador Internasional halao vizita kortezia ida ho Prezidente Republika antes halao observasaun ba eleisaun parlamentar.

“Ami nudar entidade neebe simu kortezia husi Prezidente Republika, tanba nee laiha asuntu ruma neebe ami atu diskuti ho Xefi Estadu,” tenik nia.

Iha enkontru nee Prezidente Republika Jose Ramos Horta hatete, Observador Internasional mai haree kondisaun Timor Leste atu halo observa ba eleisaun parlamentar 21, neebe halo nusa ho preparasaun.

Ekipa nee too iha Timor Leste hodi halo observasaun iha loron Kuarta no ohin mai hasoru PR hodi komprimenta no rona hanoin ruma.

(eme)

LEAVE A REPLY

Please enter your comment!
Please enter your name here