OJE MTK Milhaun US$ 12, Sei Loke Dirasaun Transporte Munisipiu 5

DILI, STLNEWS.co – Orsamentu ba Ministeriu Transporte no Komunikasaun (MTK) ba 2024 montante milhaun US$ 12, no 134 sei loke dirasaun transporte ba munisipiu 5.

Informa Ministru Transporte no Komunikasaun (MTK), Miguel Manetelu katak, orsamentu ba MTK iha milhaun US$ 12, maibe iha mos orsamentu oituan ba infraestrutura, hodi halo estudu viabilidade no dezenhu ba portu balu neebe tama iha programa IX Governu nian atu konstrui.

“Orsamentu milhaun US$ 12 nee ba operasional ministeriu salariu no vensimentu, iha mos kapital menor U$ 134 mil, atu hodi loke Dirasaun Transporte no Komunikasaun iha munisipiu 5, neebe seidauk iha, hanesan Manatuto, Ainaro, Aileu, Ermera ho Likisa, nunee mos atu sosa komputer hodi sira bele halo servisu iha munisipiu”, katak Ministru Transporte no Komunikasaun (MTK), Miguel Manetelu ba jornalista, Tersa (21/11/2023) iha Palasiu Governu.

Tuir nia, MTK ba 2024 laiha projetu boot ruma, so iha deit estudu viabilidade ba portu balu, karik biban kompleta ho dezenhu, nunee iha 2025 bele hahu, neebe portu hanesan Airabela, Coom, Atauro i atu melhora tan iha Oekusi.

Enkuantu Portu Dili tama hotu, maibe nia dezenvolvimentun total sei hein orientasaun husi Primeiru Ministru, tanba vizaun atu portu Dili sai Portu Kuzeirus nee sei hein orientasaun PM.

Estudu viabilidade nee osan la tama iha milhaun US$ 12, maibe nia tama iha fundu infraestrutura.

(gui)

LEAVE A REPLY

Please enter your comment!
Please enter your name here