DILI, STLNEWS.co – Tempu resesu deputadu no deputada sira iha Parlamentu Nasional (PN) nafatin tun halo kontaktu eleitoral no konsolidasaun iha baze hodi hametin partidu, tanba nee Partidu KHUNTO nia estrutura metin no la nakdoko atu hasoru eleisaun parlamentar.
Tuir Xefi Bankada KHUNTO, Deputada Olinda Guterres hatete, relasiona ho tempu resesu, laos feriadu hanesan baibain, maibe sira tun ba baze halo konsolidasaun no kontaktu eleitoral ho eleitores sira iha munisipiu, atu prepara ba eleisaun parlamentar tinan 2023.
“Ami Partidu KHUNTO estrutura metin nafatin no la nakdoko atu hasoru eleisaun parlamentar”, katak Olinda Guterres, ba STL liu husi telefone, Tersa nee (26/07/2022).
Nia informa, Partidu KHUNTO neebe foin moris, deputadu sira mos foun, politika mos foin moris, tanba sira ba kontaktu eleitoral no konsolidasaun nee, Partidu KHUNTO sempre rona preokupasaun eleitores sira nian, atu nunee hadia no hametin estrutura hasoru eleisaun iha tinan 2023.
Nunee mos deputadu husi Bankada KHUNTO, Luis Roberto, katak sira nia estrutura metin hahu husi nasional too iha baze, tanba nee sira prontu atu hasoru eleisaun parlamentar.
Nia katak, sira nafatin tun ba halo kontaktu eleitoral no konsolidasaun ho eleitores sira iha munisipiu hotu, nunee hametin liu tan estrutura iha baze para hasoru eleisaun.
(gui)
