DILI, STLNEWS.co – Reprezentante povu iha uma fukun Parlamentu Nasional (PN) liu husi Xefi Bankada KHUNTO, Olinda Guterres, lamenta gasta osan povu hodi desloka ba Indonezia hamutuk ho Prezidente Republika (PR), Jose Ramos Horta, maibe deputadu sira sai hanesan boneka iha viajen ida nee.
“Ami lao gasta osan boot ba toba iha Hotel no selu aviaun, nusa mak osan ida nee la hela ba povu, tanba saida mak ami nain 5 tenki tuir hodi hasai osan futun boot-boot gasta ba Estadu Indonezia, nee hau ladun gosta. Deputada nain 5 mak ba, maibe nain 4 sai hanesan boneka, Deputadu Mariano Assanami mak hanesan deputadu duni hodi tuir PR,” dehan nia iha PN, Segunda nee (25/07/2022).
Nia tenik, atu ba reuniaun ho nasaun 2 nia asinatura nee mos deputadu nain 5 la tuir, no iha ikus liu nee mak Deputadu Mariano Assanami Sabino mak tuir hodi akompanha PR ba iha kopal ninian.
(dom)
