DILI, STLNEWS.co – Prezidente Republika (PR) Jose Ramos Horta hatoo agradese, tanba Orsamentu Retifikativu aprova ona iha Parlamentu Nasional, maibe PR duvida membru governu balun esperensia laiha.
Prezidente Republika Jose Ramos Horta hatoo Kestaun nee ba jornalista sira, bainhira remata halo palestra konaba Okajiaun Diplomacy Training, iha Palasiu Prezidente Bairo Pite, Sesta (25/08/2023).
“Premeiru Ministru mak hatete, membru governu sira nee ninia, hau duvida tanba balun esperensia laiha liu, ema ho esperensia tinan kotuk nee sai tiha ona, agora hatama ema foun asesor foun, hau la hatene asesor nee iha esperensia ka lae, iha estudu ka lae, hau la hatene nee responsablidade ministru, visi ministru, sekretariu estadu idak-idak responsabilidade ba Primeiru Ministru.
PR hatete, Primeiru Ministru fo responsabilidade ba sira, no PM rasik mos avija tiha ona fo fulan tolu, dezafiu boot ba membru governu sira agora mak ida nee, iha tinan 2024 tenki halo programa anual, ho programa anual mak bele justifika orsamentu.
“Se o la halo programa diak, oinsa mak o husu fali ho orsamentu, Primeiru Ministru rigorozu ho ida nee, se ministru laiha esperensia, maibe asesor nebee mak kompotente diak, tanba asesor nia papel mak ajuda Primeiru Ministru para ajuda ministru, maibe se o hatama asesor tanba politika la hatene buat ida, nee sekretariu estadu, visi ministru sei araska,” katak nia.
Xefi Estadu hatete, nia tuir haree ministru balun diak, tanba iha kapasidade no dumina materia, hanesan Ministra Edukasaun Dulce De Jesus, Visi Ministru Finansas Elder Lopes, Nomos Agio Pereira, no balun tan, tanba sira matenek no iha esperensia, maibe balun foun.
“Mais nee mos hau komprende, iha rai liur mos nunee, politiku sira kuaze foun, hanesan Amerikanu, maibe sira nia asesor nee mak Top, maibe agora asesor kada Sekretariu Estadu no visi ministru hili asesor, tanba nee, nia kualifikasaun akademiku forti, esperensia diak, matenek ka, ou tanba nia mai husi partidu, mai husi arte marsiais, mai husi Korka, PSHT, 77, se nunee entaun kuitadu, ministru nee fulan 3 deit sai ona, maun Xanana mak hatete fo fulan tolu,” dehan PR Horta.
Prezidente Republika hatete, desizaun husi Primeiru Ministru neebe hatete fo fulan tolu hodi halo avaliasaun ba iha servisu membru governu sira nia, ida nee tempu neebe mak lais tebes, maibe PR sujere fo fulan 6 mak halo avaliasaun ba iha membru governu sira. Tanba fulan tolu deit oinsa sira laiha posibilidade hodi hatudu sira nia esperensia.
“La dehan aseita ka la aseita, maibe fulan tolu nee hanesan ezejeradu oituan, sira foin mak tuur meza kadeira seidauk iha, fatin servisu seidauk iha, agora halo avaliasaun fulan tolu liu ba lae, diak liu fo tan fulan tolu ba fulan 6 pelumenus, test sira mak haree sira iha kaspidade organiza sira nia ofice, maneira sira organiza sira nia ofice, programa, nee baze prinsipal, organiza ofice tau ema neebe mak didiak, estudu no esperensia, nee hatudu ona governasaun, primeiru fulan 3 no fulan 6 nee, liu-liu atu organiza ofice nee,” katak nia.
Primeiru Ministru Kay Rala Xanana Gusmao mos hatete, oras nee daudaun orsamentu retifikativu aprova ona husi Parlamentu Nasional, no sei hatoo ba iha Prezidente Republika Jose Ramos Horta hodi bele halo promulgasaun, nunee governu bele halo servisu hodi hadia, lori nasaun nee ba oin.
(eme)
