DILI, STLNEWS.co – Tuir planu IX Governu sei submete Orsamentu Retifikativu (OR) ba Parlamentu Nasional (PN) iha dia 10 Agustu. Ho orsamentu nee mai sei diskuti, maibe laiha hanoin atu vota kontra, tanba OR hadia moris povu no nasaun.
Deputadu husi Bankada KHUNTO, Antonio Verdial hatete, governu promete katak, tarde liu dia 10 Agustu, governu submete OR ba parlamentu, neebe hanesan deputadu laos hanoin atu vota kontra deit, tenki diskuti no sei la vota kontra.
“Deputadu hanesan povu nia esperensa, mehi no povu nia hakarak, tanba kestaun vota kontra la eziste ona iha hau nia kakutak, maibe sei diskuti mak vota, tanba OR ba povu no nasaun”, katak Deputadu husi Bankada KHUNTO, Antonio Verdial ba STL Tersa (08/08/2023) iha parlamentu.
Nia hatete, nudar reprezentante povu tenki vota ba Orsamentu Jeral Estadu, tanba OJE ba interese povu ho nasaun, laos reprezenta ema ida nian.
“Tanba nee, ami sei vota afavor no fo biban ba governu hodi servi povu no nasaun”, tenik Verdial.
Nia klarifka, dehan vota afavor, maibe hanesan opozisaun laos atu foti loos deit kartaun azul ka afavor, maibe sei lee diak dokumentus ka orsamentu sira, atu nunee buka meius hodi hadia povu nia moris. Se haree mak iha item balu ladun benefisiu, husu halo alterasaun nunee hadia povu nia moris no halao dezenvolvimentu ba nasaun.
(gui)
