DILI, STLNEWS.co – Reprezentante povu iha uma fukun Parlamentu Nasional (PN) preokupa pagamentu direitu ba idozu sira nian neebe tarde, Bankada PD husu fukun saida mak prejudika Ministeriu Solidaridade Sosial no Inklujaun (MSSI) labele prosesa ba diretu refere.
Deputada Bankada PD, Sancia Tilman dehan, hakarak interven ba direitu maluk idozu sira nia, neebe sira nia direitu subsidiu ba idozu simu tinan 1 dala 2 neebe kada fukan 6-6.
“Tinan ida nee too fulan 6 liu ona, agora tama ba fulan 7 ona mais sira seidauk simu tan sira nia direitu refere, entaun fukun ka razaun saida mak prejudika ka taka dalan ba MSSI hodi seidauk bele prosesa maluk idozu sira nia direitu idozu nian,” dehan nia liu husi intervensaun iha PN, Segunda (31/07/2023).
Nia haktuir, tuir informasaun husi maluk idozu sira balun katak, iha tinan 1 ka 2 ba kotuk sira balun simu sira nia direitu idozu nian tinan 1 dala 1 deit, entaun ho situasaun atual agora dala ruma bele mos akontese iha tinan ida nee, ba maluk sira neebe simu tinan 1 dala 1 deit.
Nia sublina, nunee husu ba parte relevente atu toma konsiderasaun ba iha lamentasaun mai husi maluk idozu sira nian, hodi bele fo solusaun ba iha situasaun refere.
“Tanba hau hanoin ba direitu sira neebe mak sira la simu, sira mos hanesan ho ita, tanba dala ruma ita sira tur iha nee kuandu direitu fulan 1 deit mak la simu ka atraza iha data deit mos ita lamentavel, apalagi ba maluk idozu sira neebe simu sira nia direitu ho US$ 50 ho tarde hanesan nee,” tenik nia.
Nia hatutan, karik husi parte MSSI mak laiha resposta ruma, mak sei bolu parte relevante atu mai fo esplikasaun iha PN.
(dom)
