PAM Manatutu Husu MOP Labele Taka Matan Ba Ponte Lamara

MANATUTU, STLNEWS.co – Prezidente Autoridade Munisipiu (PAM) Mantutu, Luis Fernandes husu ba governu liu husi Ministeriu Obras Publikas (MOP) atu tau prioridade ba konstrusaun Ponte Lamara, tanba tinan barak ona sempre impede movimentasaun populasaun nia bainhira udan monu rai mota tun.

“Hau husu labele husik no haree deit Ponte Lamara nee, ami sei buka meus hotu-hotu para konstrusaun ponte nee bele sai prioridade ba konetividade entre Postu Administrativu Bariki ho Mantutu,” hatete Prezidente Autoridade Munisipiu Mantutu, Luis Fernandes ba jornalista sira iha sede Suku Aubeon, Postu Bariki, Munisipiu Mantutu, Segunda nee (12/02/2024)

Nia hatutan, Ponte Lamara nee grave tebes, tanba konektividade durante nee lao la diak, kuandu udan boot mota tun liu oras 2 ka 3 komunidade la bele halo movimentasaun, hein bee maran mak komunidade sira foin bele halo movimentasaun.

Tuir nia, Ponte Lamara iha Suku Uma Bokon, Postu Administrativu Bariki nee presiza konstrusaun lalais, tanba projetu Tasi Mane hahu ona halo sosializasaun, kerdijer frekuensia viajen husi Dili mai sei barak la halimar.

Tanba nee, Autoridade Munisipiu hahu elabora ona proposta, bainhira hotu tiha sei aprezenta liu husi MOP, oinsa mak sira bele halo intervensaun imediata no konstrusaun ba ponte nee.

“Agora ami prepara hela proposta atu hatoo ba MOP liu husi Konselhu Administrasaun Fundu Infraestrutura (KAFI), karik nia tama iha pakote emerjensia, iha tempu badak hau hanoin proposta sei aprezenta ona ba, atu sira bele hahu halo levantamentu kontrusaun, nunee konetividade Mantutu Vila ho setor norte lao, para dezenvolve ita nia ekonomia, se lae problema konetividade sei afeita ba kustu sira nee sae boot tebes-tebes,” esplika nia.

(alb)

LEAVE A REPLY

Please enter your comment!
Please enter your name here