LOSPALOS, STLNEWS.co – Luciano Timor Maubere hatete, partidu plataforma fraku, tanba nee nia la fiar katak partidu tolu nee sei alkansa nia mehi iha eleisaun parlamentar 2023.
Tuir nia, lideransa Partidu FRETILIN kompostu husi Lú Olo ho Mari Alkatiri povu konhese diak ona sira.
“Sira uza naran FRETILIN husi tinan ba tinan, FRETILIN nia votus sempre tuun. Ho nunee hau la iha fiar ida katak partidu tolu FRETILIN, PLP no KHUNTO sei atinji mehi neebe sira hakarak, totalmente sira sei la manan,” dehan Timor Maubere ba STL bainhira partisipa iha komisiu eleitoral ba da haat CNRT nian iha kampu futebol Lautem, eis asrama 745 Lospalos, Tersa nee (25/04/2023).
Nia hatete, Eziste dezde 2007, Partidu CNRT nia votus kontinua aumenta, naran ida Kay Rala Xanana Gusmão identiku mos ho Ponta Leste ka rai Lospalos.
“Forsa politika neebe ohin halibur iha nee, konta ho CNRT nia aliadu sira, hau iha esperansa Partidu CNRT ho numeru sorteiu 12 sei hetan votus signifikante iha rai Lospalos, no fiar aan sei lori Maun Boot Kay Rala Xanana Gusmão ba kaer IX Governu.
Partidu CNRT neebe lideradu husi Maun Boot Xanana Gusmao iha vizaun klaru ona.
“Ita hein, bainhira eleisaun hotu sei forma governu, mehi boot neebe CNRT iha liu husi Partidu CNRT, atu dada kadoras husi tasi laran mai Timor Leste, nunee bele fo benefisiu liu husi dalan ekonomia hodi enkaixa joven rihun ba rihun para servisu iha projeitu nee,” tenik nia.
Iha fatin hanesan, Koordenador Partidu CNRT Munisipiu Lautem, Albino da Silva hatete, Lospalos oan preparadu atu lidera, bainhira CNRT kaer mak implementa desentralizasaun, sira prontu atu kaer ukun iha governasaun neebe mai.
“Lospalos oan prontu atu kaer rasik governasaun lokal iha governasaun oin mai, bainhira CNRT kaer ukun,” hatete nia.
Tanba nee, Koordenador CNRT husu ba militante no simpatizantes sira atu fo votus maioria absoluta ba Maun Boot Kay Rala Xanana Gusmão nia Partidu CNRT, hodi nunee bele lori povu ba moris diak.
“Husu ba imi hotu iha loron eleisaun neebe sei monu iha 21 Maiu 2023, keta haluha vota CNRT, vota ba numeru 12, hodi nunee CNRT bele hetan votus maioria absoluta iha Lospalos, para maun boot bele ba kaer ukun hodi lidera IX Governo,” tenik nia.
(cri)
