DILI, STLNEWS.co – Durante nee sosiedade sira preokupa konaba armamentu neebe Polícia Científica de Investigação Criminal (PCIC) sira utiliza, tanba nee Ministru deklara, armamentu tau iha armazen, utiliza iha situasaun neebe ameasa ba sira nia vida.
“Programa governu halo reforma ita tenki halo, laos reforma ema deit, maibe sira nia maneira servisu. Iha mos armamentu agora sira nia armas hotu tau tiha iha armazen, so bele uza iha autorizasaun husi diretor,” dehan Ministru Justisa Amandio de Sa Benevides ba jornalista sira iha Edefisiu MJ, Segunda (11/09/2023).
Nia hatete, armas bele uza bainhira iha investigasaun sira neebe ho natureza krimi ameasa sira nia vida, no situasaun hanesan investigador bele autoriza hodi uza armas de fogu neebe lei fo hela sira atu uza. Antes sira uza loron-loron reforma hanesan Diretor PCIC bele halo ona ida nee, haree mos ba estandar nebee iha atu servisu investigasaun no servisu administrasaun sira nian hotu alina ho lei neebe iha, alina mos ho programa governu nian atu halo reforma hodi halo servisu investigasaun nian diak liu, hodi atende prosesu sira neebe haruka husi Ministeriu Publiku mai, ka prosesu sira neebe hetan keixa husi komunidade ba natureza krimi.
Iha fatin ketak, Jurista Alexandre Corte Real dehan, lei fo dalan atu polisia bele utiliza armas, maibe tenki tuir regra neebe iha.
“Hau hanoin lei fo dalan atu polisia sira utiliza Arma de Fogo, maibe tenki haree lai iha situasaun ida nee, se iha situasaun balu sira senti la seguru bele utiliza,” dehan nia.
Tuir Alexandre, utiliza armas tenki tuir regra neebe iha, no kontrola aan atu labele mosu fali ba situasaun neebe la diak, tanba armas hanesan parte ita atu asegura deit bainhira iha prosesu balu neebe senti ameasadu ba ema nia vida.
(ter)
