PD Prontu Hamriik Ho CNRT

DILI, STLNEWS.co – Partidu Demokratiku (PD) prontu hamriik ho partidu mais votadu iha eleisaun parlamentar Partidu CNRT, tanba informalmante koalia ona, neebe ho votus 65.359 povu fo ba PD, PD prontu servi povu.

Tuir Sekretariu Jeral Partidu Demokratiku, Antonio da Conceição Kalohan katak, povu Timor-Leste ezerse ona direitu no daudaun nee iha prosesu kontajen de votus, tanba nee husu atu hotu-hotu pasiensia hein saida mak atu mai. Ida neebe atu mai nee povu rasik mak desidi, neebe husu povu tomak, lideransa sira neebe hamriik iha partidu, hakmatek hein rezultadu ikus hodi dignifika povu.

Tuir nia, PD hamriik nafatin iha fatin, normalmente iha tempu situasaun difisil, ema hotu halai taru dere odamatan PD nian, maibe agora PD tenki hola opsaun.

“Primeiru opsaun ami respeita povu nia lian, hodi desidi ona Partidu CNRT sai hanesan vensedor, maski laos manan multak. PD la presiza hein se mak atu mai dere odamatan, PD iha opsaun uluk ba povu katak, hamriik daudaun ho partidu neebe mak povu tatoli hela lian ka votus”, katak Sekretariu Jeral PD, Antonio da Conceição Kalohan ba jornalista iha sede nasional PD, Kolemra, Tersa (23/05/2023).

Nia deklara, PD atu hamutuk ho CNRT forma governu ka la forma governu, ida nee buat neebe mak sei tuir mai, i sei respeita demokrasia, respeita vontade partidu seluk iha hasoru PD, se bainhira sira matan monu ba PD atu sai belun diak ba vida nasaun nian nee PD hein, maibe ho votus 65.359 tenki dehan, PD tenki servi povu, servi ho dalan saida deit, depois sei koalia, PD hanoin tenki lao ho ida neebe mak povu tatoli hela sira nia lian.

Nia hatete, CNRT konvida forma governu da-9, PD sei la fo opsaun, tanba PD laos primeira esperensia ukun hamutuk ho CNRT, ukun hamutuk ona iha tinan 10, lao hamutuk fila fali iha opozisaun. CNRT tinan rua resin, maski PD opozisaun tinan 5, maibe atu dehan, ho ida neebe manan ona la presiza atu koalia, maibe CNRT hatene PD.

“Forma governu inisiu ami informalmente koalia ona, tanba nee votus durante PD ho CNRT fo hamutuk iha PN, ami nia politika neebe halo iha terenu, kordenasaun servisu neebe halo hodi ajuda malu iha eleisaun, hatudu ona prosesu informal, maibe PD tenki respeita mos CNRT, karik sei hola opsaun”, tenik Kalohan.

Se CNRT hola opsaun PD prontu servi, laos tanba ba buka kargu, maibe tanba votus 65.359 resin neebe fo. PD senti katak povu presiza PD atu halo netik buat ruma ba nasaun no povu ho rai ida nee.

Tuir nia, rezultadu eleisaun hein husi tribunal, maibe opsaun neebe PD desidi liberdade atu halo, neebe PD lao tuir povu nia lian, PD justu demokratiku, fraternu, solidariu, labele hamriik loko aan.

Nia deklara, governasaun mai PD mos iha hanoin rasik, karik sira mos bele koalia karik belun neebe mak manan maioria hamutuk ho PD sira bele tetu, maibe PD sei aprezenta mos estrutura, reflete ba durante halo iha kampanha, maibe laos ba PD deit, se rona sira nia lian, rona mos partidu seluk nia lian, hodi aprezenta estrutura bele responde ba promesa hotu iha kampanha.

Espekulasaun katak, PD atu lao hamutuk ho plataforma partidu tolu hodi forma governu nee laos PD nia prinsipiu, tanba prinsipiu PD katak, lian povu mak lian Maromak. Maski dehan plataforma atu orefese lideransa governu da-9 ba PD la importante, maibe PD hatene ema neebe mak atu oferese ba PD.

(gui)

LEAVE A REPLY

Please enter your comment!
Please enter your name here