DILI,STLNEWS.co – Funsionamentu Parlamentu Nasional (PN) kontinua lao normal, maski deputadu sira tun ba halao kampanha durante fulan ida, maibe kada semana sei halao sesaun plenaria dala ida iha loron Tersa.
Informasaun ne’e hato’o husi Sekretariu Jeral PN, Adelino Afonço de Jesus katak, iha periodu kampanha ne’e, funsionamentu PN lao hanesan baibain, hahu husi Segunda too Sesta, hanesan kada semana loron 2 Segunda ho Tersa sesaun plenaria, Kuarta ho Kinta atividade komisaun, Sesta deputadu sira tun ba halo kontaktu eleitoral.
“Durante periodu kampanha hahu husi 19 Abril too 18 Maiu funsionamentu lao nafatin, maibe sesaun pleniaria sei realiza kada semana dala ida deit iha loron Tersa”, informa Sekjer PN Adelino Afonço de Jesus ba jornalista sira iha PN, Kuarta nee (19/04/2023).
Nia dehan, normalmente plenaria dala rua iha Segunda ho Tersa, maibe tanba periodu kampanha konsidera deputadu hotu ba munisipiu halao kampanha, tanba ne’e sira tun husi foho mai iha loron Segunda laiha tempu, tanba ne’e Tersa sira foin prezensa iha parlamentu hodi bele realiza plenaria.
Laos ne’e deit, mai atu realiza plenarai, fim de semana prezidente PN konvoka reuniaun ho lider bankada parlamentares sira hodi desidi ajenda ba plenaria.
Maibe agora iha kampanha nee konferensia lider bankada sei laiha, tanba antes tama ba kampanha ne’e reuniaun lider bankada desidi ona, perante fulan ida kampanha, funsionamentu PN lao normal, maibe plenaria loron por semana iha Tersa, ne’ebe sei laiha reuniaun lider bankada too remata kampanha.
Entretantu, observasaun STL haree katak, segundu orgaun soberanu Parlamentu Nasional funsionamentu nafatin lao hahu husi sekretraiu jeral mai too kliner, maski laiha deputadu sira hahu iha loron kampanha ohin 19 Abril, tanba deputadu sira hotu tun ba halao atividade kampanha.
Maibe tuir orariu ne’ebe PN estabelese ona katak, durante periodu kampanha fulan ida, PN sei halao plenaria dala ida kada semana iha loron Tersa, nunee fo tempu ba deputadu sira atu halao kampanha tuir partidu idak-idak.
(gui)
