DILI, STLNEWS.co – Bankada Partidu Libertasaun Popular (PLP) iha uma fukun parlamentu Nasional (PN) afirma, sira sei la hakfodak bainhira CNRT ukun atu halo auditoria ba iha sesta bazika inklui subsidiu US$ 200, tanba sei kontribui ba jestaun estadu ida neebe mais transparente promove boa governasaun.
Tuir Deputada Bankada PLP, Maria Angelina Lopes Saramento dehan, auditoria nee labele tauk, tanba auditoria mak atu bele sukat jestaun saudavel ka lae, ezekuasaun orsamentu saudavel ka lae, entaun PLP gosta liu kuandu PLP ukun iha oportunidade partidu seluk neebe mai ukun hakarak halo auditoria ba ezekusaun OJE, ida nee hatudu katak PLP prontu hakruk no kumpri ba lei no regras sira neebe vigora.
“Dehan CNRT ukun sira sei halo auditoria esterna, ami nunka hakfodak liu, ami nakloke tebes-tebes, i peluvistus ita haree depois PLP ukun kuandu 2021 PN aprova tiha lei sobre medidas prevensaun i kombate korupsaun iha 2021/2022, kuandu survei internasional halo konaba indise persesaun ba korupsaun ita heten renkin neebe diak, no iha progresu signifikativu kompara ho tinan kotuk liu ba CNRT ukun, lei ida nee tau iha gaveta too kaduka deit laiha aprovasaun,” dehan nia ba STL iha PN, Segunda (24/04/2023).
Nia dehan, entaun lei nee aprova iha fulan julu 2020 entaun, mai 2021, 2022 indise persesaun korupsaun tun, nee hatudu katak, TL komesa rigorozu aplika implementa lei sira neebe vigora atu kontribui ba hametin instituisaun estdau sira hodi bele reforsa estadu de diretu demokratiku.
Nia afirma, tanba nee PLP kontete tebes se iha tan auditoria ba SB, sei kontribui ba jestaun estdau ida neebe mais trasparente promove boa governasaun, no hatur estadu de diretu demokratiku iha nia fatin mos.
Aleinde nee, Visi Prezidente Bankada Fretilin, Deputadu Antoninho Bianco hatete, uluk auditoria nee mekanismu ida atu deteta buat sira nee laos loos ka lae.
“Klaru asaun sira neebe mak uluk CNRT halo kleur nee mos iha kontinuasaun balun sei prosesu lao hela nee normal, ema dehan parte ida integrante iha prosesu dezenvolvimentu iha planu ezekusaun, kontrolu ate iha auditoria, uluk hau rasik prezide ekipa ida komisaun inkeritu parlamentar, hau prezide ho projetu sira neebe CNRT fo deit la solusiona, depois agora ami buka solusiona laiha problema,” dehan nia.
Nia afirma, neebe prosesu inkeritu ka prosesu auditoria nee normal kualker partidu ida bele halo ida nee, tanba nee orsamentu estadu.
“ Hau hanoin FRETILIN hanorin sira seluk para halo tuir, tanba ita hatene katak FRETILIN nia ema durante ukun nunka tama kadea, sira seluk neebe uluk uluk neebe ukun mak tama tanba kestaun korupsaun,” hakotu nia.
(dom)
