DILI, STLNEWS.co – Bankada Partidu Liberta Povu (PLP) iha uma fukun Parlamentu Nasional lamenta ho deklarasaun husi Visi Ministru Infraestrutura, Julio do Carmo neebe hatete, sei hapara projetu konstrusaun estrada diresaun Laga-Baguia no Kelikai-Nahareka, neebe lansa ona iha fulan Dezembru 2022.
Tuir Xefi Bankada PLP, Angelina Sarmento hateten, Visi Ministru Infraestrutura presiza hanoin didiak atu kansela projetu reabilitasaun estrada husi Laga-Baguia no Kelikai- Nahareka, tanba antes implementa projetu liu husi prosesu neebe naruk.
“Hau hakarak hatoo preokupasaun ligadu ho deklarasaun husi Visi Ministru Infraestrutura neebe fo sai iha media foin lalais nee, neebe deklara hakarak kansela projetu ida nee, ami lamenta tebes, tanba ida nee laos prosesu ida neebe baibain, laos ambitu ida neebe hakarak fo deit no fahe deit, maibe lao tuir prosesu neebe naruk,” dehan nia liu husi plenaria iha PN, Segunda nee (10/07/2023).
Nia hatutan, prosesu tenderizasaun ba projetu rua nee lori tempu neebe naruk, tanba nee governu hakarak kansela projetu nee presiza tetu didiak, tanba estrada nee mos durante nee populasaun sira husu beibeik governu atu reabilita.
Aleinde nee, reprezentante povu nee akresenta, dezde V Lejislatura mos deputadu sira ezije ona atu reabilita estrada ba postu rua nee tenki implementa, tanba tinan barak ona povu ezije atu hadia estrada nee, tanba sira labele asesu ba merkadu.
Iha parte seluk, Visi Ministru Infraestrutura Julio do Carmo liu husi pajina Facebook ofisial deklara, relasiona informasaun neebe publika liu husi notisia online balun ho titulu katak, governu sei hapara kontratu projetu reabilitasaun estrada Laga-Baguia no Kelikai-Nahareka nee lalos ka hoax, tanba notisia nee laos mai husi fontes ofisial Visi Ministru Infraestrutura.
“Tanba nee, atu klarifika ba publiku katak, informasaun neebe fo husi rede sosial (Online) iha loron fulan Junhu 2023 nee laloos ka hoax,” haktuir nota komunikadu nee.
Entretantu, antes nee iha loron Sesta (09/06/2022) eis Primeiru Ministru (PM) Taur Matan Ruak lansa ona fatuk dahuluk ba reabilitasaun estrada pakote diresaun Laga-Baguia no Kelikai ba Nahareka.
(alb)
