DILI, STLNEWS.co – Primeiru Ministru Kay Rala Xanana Gusmao relata rezultadu Orsamentu Retifikativu neebe mak aprova ona iha Parlamentu Nasional ba iha Prezidente Republika Jose Ramos Horta.
Bainhira remata halo enkontru, Primeiru Ministru Kay Rala Xanana Gusmao ba jornalista iha Palasiu Prezidente Bairo Pite Kinta (24/08/2023) hatete, hanesan baibain kada semanalmente sempre mai relata servisu governu nia ba iha Prezidente Republika.
“Ita boot sira hatene ona katak semanalmente hau tenki mai hasoru prezidente hodi informa saida mak governu halo no saida mak governu seidauk halo, no karik prezidente husu razaun saida mak la halo, nunee PM tenki esplika,” dehan Primeiru Ministru Xanana Gusmao.
Iha biban nee, Primeiru Ministru hatete ohin nia relata mos konaba orsamentu retifikativu neebe mak aprova ona iha parlamentu Nasional ba iha Prezidente Republika.
“Aprova Orsamentu Retifikativu, prezidente hatene ona tanba prezidente iha telefone, tanba nee nia hatene ona, tanba nee mak hau informa deit, no mai imforma mos konaba klima ambiente, ita dehan karik dehan amizade, iha parlamentu sempre hanesan nee, neebe akontese hahu husi programa too ohin aprova, no prezidente mos husu agora halo saida, hau dehan lae agora ami sei iha buat barak atu halo hanesan iha loron 120 neebe imi akompanha hela, ida nee agora tenki halo nafatin, ministeriu sira seidauk hotu, no hau loron-loron haruka beibeik mai prezidente nia liman mos kolen tiha ona, tanba tenki asina ba para promulga, nomos iha lei balun tan neebe mak sei altera,” katak PM Xanana.
Primeiru Ministru hatete, nia mos mai informa ba prezidente konaba kazu neebe mak iha tribunal neebe too ohin loron seidauk halo julgamentu barak, tanba nee buka atu partisipa iha koresaun hadia para estadu nee bele lao ho komfiansa.
“Nudar Prezidente Republika garante bom funsionamentu instituisaun demokratika, tanba nee komportamentu ho disponibilidade parlamentu neebe mak aprova tiha Orsamentu Jeral Estadu, nudar PR eziji mai katak saida mak tenke halo, nee halo duni lae ita promete promete lahalo tanba nee tenke halo duni,” katak PM Xanana.
PM informa katak, agora halao tiha kestaun juridika iha koresaun ka alterasoens lei ruma neebe governu sei aprezenta iha Konselhu Ministru, no komesa prepara planu asaun annual ba 2024, 2025 hodi prepara ona Orsamentu Jeral Estadu ba 2024 nia.
Iha biban nee, Prezidente Republika Jose Ramos Horte hatete, nia kontenti tanba ho Orsamentu Retifikativu neebe mak aprova ona iha Parlamentu Nasional.
“Hau konkorda no kontenti ho Orsamentu Retifikativu, kontenti governu bele halo retifikasaun mos ba lei orsamentu para fila fali ba lei orsamentu neebe mak tuir regra estandar internasional neebe uluk internasional elujia tebes ba Timor Leste, depois governu muda, nemak provoka demora iha orsamentu retifikativu mais nee liu tiha ona hau kontente,” dehan PR Horta.
(eme)
