DILI, STLNEWS.co – Primeiru Ministru Kay Rala Xanana Gusmao hatete, maski oras nee sei ilegal hela, tanba seidauk promulga lei organika, maibe sei buka dalan oinsa hatun folin sasan iha merkadu, nunee labele difikulta ba povu kiik sira.
Primeiru Ministru Kay Rala Xanana Gusmao hatoo lia hirak nee bainhira remata halo enkontru ho Prezidente Republika Jose Ramos Horta iha Palasiu Prezidente Bairo Pite, Kinta (27/07/2023).
“Agora hau seidauk koalia buat ruma, tanba hau seidauk legal, hau sua exelensia deit, Primeiru Ministru deit, mais ida nee hotu loron ida temi tiha ona katak sei hatun. Tanba iha mundu normalmente kuandu iha situasaun neebe difisil governu hasae impostu atu halo saida, tanba saida governu hasae impostu iha mundu, iha rai hotu atu bele hetan reseitas domestika,” katak Xanana.
Primeiru Ministru hatutan, governu hasae impostu atu hasae reseitas domestika hodi halo tan buat seluk ba rai ida nee.
Xefi Governu afirma, tanba sa iha reseita petroliu, nia prinsipiu mak petroliu nee povu ninia, povu terus mak hetan ida nee, nee duni labele estraga no labele uza arbiru, reseita iha tiha ona, hasae buat neebe bele hasae laos arbiru deit, laos kaer osan nee tau tiha banku uza ba mai arbiru.
(eme)
