DILI, STLNEWS.co – Primeiru-Ministru Kay Rala Xanana Gusmão Domingu nee (03/09/2023) halao primeira vizita servisu ba Jakarta, Indonezia, hafoin simu pose iha loron 01 Junhu.
Vizita ofisial nee hodi partisipa iha enkontru nivel altu Association of Southeast Asian Nation (ASEAN) nasaun sira membru Sudeste Aziatiku nian ka ASEAN ba dala-43 iha Jakarta-Indonezia.
Tuir nota komunikadu neebe STL asesu husi media Gabinete Primeiru-Ministru Domingu (03/09/2023) nee sita katak, Xefi Governu Xanana reprezenta Timor-Leste partisipa iha simieira ASEAN nian neebe sei partisipa direita husi Xefi Estadu no Xefi Governu Nasaun 26 neebe sei realiza iha loron 05 too 07 Setembru 2023.
Tuir agenda, Xefi Governu sei too Jakarta iha loron 04 Setembru 2023 iha oras 08:20-10:00
Primeiru Ministru Xanana ho delegasaun Visi Primeiru-Ministru-1, Fransisco Kalbuadi Lay, Ministru Negosiu Estranjerus no Kooperasaun (MNEK), Bendito dos Santos, Ministru Interior, Fransisco da Costa Guterres, no Embaixador José António Amorin Dias sei halao enkontru ho Prezidente Repúblika, Indonezia Joko Widodo no hasoru malu ho lideransa ASEAN sira.
Partisipasaun Timor Leste iha enkontru ne’e sai nuudar obserbador hodi rona no aprende esperensia hosi lideransa ASEAN sira hodi hein agenda Timor-Leste sai membru iha tinan 2024.
Iha Jakarta, PM Xanana sei partisipa mós ekontru ASEAN Business & Investment Summit 2023 neebe partisipa husi orador no lideransa ASEAN no setor privadu neebe sei lansa hosi Ministru Investimentu Republika, Indonezia Zilkifli Hasan no Sekretariu Jerál ASEAN, Kao Kim Hourn.
Tuir ajenda tentativa, durante iha Jakarta, Xanana sei halao entrevista ho jornalista nasaun membru ASEAN hodi husu pozisaun Timor-Leste konaba kazu junta militar Mianmar nian.
(alb)
