DILI, STLNEWS.co – Primeiru Ministru Kay Rala Xanana Gusmao hatete, joven sira tuir arte marsiais nee hanesan arte ida, laos uza hodi estraga malu.
Primeiru Ministru Kay Rala Xanana Gusmao hatoo kestaun ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite Kinta loraik (24/08/2023) hatete, ho kazu asaltu malu neebe mak kontinua mosu iha rai laran, governu sei bolu ministeriu neebe tau matan ba asuntu nee hodi hadia.
“Sei bolu ministeriu neebe haree ba buat ida nee, sei bolu mos arte marsiais sira, sei esforsu aan para hadia ona sira, tanba arte marsiais nee arte laos atu estraga malu, nee estraga malu laos arte, no arte marsiais laos sai arte marsiais estraga malu, nee problema neebe mak mai kleur tiha ona,” dehan PM Xanana.
PM Hatete, mezmu Polisia, FDTL, mos sei bolu hotu ba iha palasiu governu hodi sira halo juramentu, no foin lalais mos PM Xanana fo hatene ona ba iha polisia.
“Laos ita ba kaer hotu sira, hau la konhese sira, maibe ita tenki halo asaun ruma neebe kaer sira hotu mai, bolu mai hodi hadia, tanba PSHT, duvida malu tiha ona ho Indonezia, entaun iha nee mos duvida malu, sa arte mak ida nee, nee mak atu retoma fali politika ida uluk katak deskulpa,” katak PM.
PM hatete, tinan nee mai mos kongfu mos tenki hatudu sira nia arte hatudu ba joven sira, nomos taekwondo, buat sira nee hotu, nunee hodi sira aprezenta hodi haree katak, nee furak ou ida neeba furak liu nee mak dehan arte, laos uza arte hodi ba asalta malu.
PM hatete, se bainhira uza sala arte sai fali tuku malu oho malu se beibeik akontese mak sei haree.
Relasiona ho grupu sira neebe mak kontinua asaltu malu, Prezidente Republika Jose Ramos Horta hatete, lider arte marsiais sira tenki responsabliza ba nia membru sira bainhira asaltu malu iha publiku.
PR hatete, lider Arte Marsiais ho Arte Rituais tenki responsabliza ba komportantementu membru sira, too agora PR haree tinan hirak nia laran nee lider sira arte marsiais la simu responsabilidade legal kriminal ba sira nia membru nia komportamentu, tenki iha lei ida fo sansaun ba organizasaun rasik.
PR hatete, avizu husi governu katak membru PNTL, F-FDTL labele inklina aan iha grupu arte marsiais no arte rituais, maibe membru governu balun sira mak marka uluk prezensa fo ondra ba grupu arte marsiais, balun iha governu laran rasik, entau governu laiha krediblidade ba ida nee.
Prezidente hatete, tuir arte marsiais no arte rituais laos hodi buka asaltu malu, maibe nee hanesan arte ida, hodi defende aan.
(eme)
