PM Xanana Husu Deskulpa Ba Linguajen La Diak

DILI, STLNEWS.co – Primeiru Ministru (PM) Kay Rala Xanana Gusmão husu deskulpa ba deputadu sira iha Parlamentu Nasional, relasiona ho hasai liafuan mal,  ka (beik ten) hasoru deputada iha debate proposta lei Orsamentu Jeral Estadu (OJE) 2024.

Liafuan deskulpa nee PM Xanana hatoo iha debate OJE 2024, faze jeneralidade iha parte lokraik, hafoin iha  parte dader akontese dezentendimentu entre PM Xanana ho deputada husi bankada FRETILIN, Maria Angelica Rangel.

“Hau hakarak husu deskulpa konaba atitude, husi liafuan beik teen, atan hau halo iha fatin lulik ida nee hanesan hau nia uma laran, tanba artigu 63 rejimentu dehan orador labele intoropidu, labele interompe bainhira ema ida koalia hela, maibe bele bainhira ema koalia dezvia tiha husi diskusaun”, hatete Xefi Governu Xanana iha debate OJE 2024, Tersa lokraik (12/12/2023).

PM Xanana hatete, asuntu diskusaun iha parlamentu nee ba iha proposta lei OJE 2024, maibe iha diskusaun temi fali buat seluk, tanba nee mak PM hasai liafuan mal sira nee. Iha situasaun nee Prezidente PN mos nonok hela, tanba nee PM mos hatan katak kazu nee lalikan tama, tanba debate OJE.

“Maibe hau husu deskulpa katak hau nia liafuan beik teen, hau jura sei la akontese tan iha PN, i hau mos husu deskulpa ba Deputadu Luis”, promete  Xanana.

(gui)

LEAVE A REPLY

Please enter your comment!
Please enter your name here