PM Xanana Husu Membru Governu Ezekuta OJE Ho Diak

DILI, STLNEWS.co – Primeiru Ministru (PM) Kay Rala Xanana Gusmao husu membru governu atu ezekuta Orsamentu Jeral Estadu (OJE) ho diak, tanba nee osan povu nia.

Primeiru Ministru Kay Rala Xanana Gusmao hatoo lia hirak nee ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidensial Bairo Pite, Segunda (12/02/2024).

Primeiru Ministru dehan, iha hasoru malu nee, Prezidente Republika mos husu PR katak, hanoin oinsa, tanba iha ona fulan Fevereiru, Orsamentu Estadu programa no planu sira bele lao? hatan ba nee PM hatete, fiar sei lao, tanba orsamentu neebe boot los maibe rezultadu laiha nee PM Xanana koa hotu tau oituan-oituan.

“Hodi dehan ba Ministru sira ezekuta diak, ezekuta diak tinan seluk ita sei fo liu tan mos bele, tanba buat ida hatun nee laos deit fiar ida nee no fiar ida neeba, maibe tanba sistema neebe muda, sistema neebe muda iha finansas nia, no diretores sira sai husi sistema ida komplikadu oituan ba fali sistema ida neebe simples, neebe hau dehan ba prezidente bele fiar katak sei ezekuta,” Katak PM Xanana.

Primeiru Ministru hatete, iha fulan Marsu liu tiha Primeiru Ministru sei lao hodi haree tuir no tau orsamentu tuir por programa.

“Orsamentu por programa, ita tau tiha programa mak ita tau osan iha programa sira nee, neebe hau sei lao hodi haree buat nee, dala rua dala tolu ministru sira mos hatene ona, laos husu los deit ministru sira, maibe diretores sira mos, tanba osan povu nia tenki jere ho diak, jere ho diak nee dehan halo ho diak,” katak nia.

Xefi Governu hatete, daudaun nee prepara ona auditoria no hahu iha Munisipiu Lautem too RAEOA no iha fatin hotu-hotu.

(eme)

LEAVE A REPLY

Please enter your comment!
Please enter your name here