PM Xanana Vizita Jardin Eroi Kalibata Antes Enkontru Ho Joko Widodo

JAKARTA, STLNEWS.co – Primeiru Ministru (PM) Kay Rala Xanana Gusmao vizita Jardin Eroi Kalibata, hodi tau aifunan no presta omenajen ba iha eroi sira antes halo enkontru ho Prezidente Republika Joko Widodo.

Tuir observasaun neebe mak STL hetan Sesta nee (26/01/2024) katak, bainhira Primeiru-Ministru Kay Rala Xanana Gusmão ho delegasaun too Jardin Eroi Kalibata, Jakarta, siimu husi protokulu Jakarta nia hakat liu kedas ba iha Jardin laran hodi presta omenajen.

Xefi Governu too iha Kalibata simu direita husi protokulu iha tuku 08.45 oras Jakarta, tama liu ba jardin Kalibata simu kedas ho formatura parade militar, remata kontinua ho tau aifunan iha semiteiru.

Remata, Primeiru Ministru kontinua halo enkontru ho Prezidente Repúblika Indonézia, Joko Widodo.

Tuir ajenda neebe STL asesu, iha tuku 10:30 oras Jakarta, Xefi Governu Xanana ho membru governu sei halao enkontru bilateral ho Prezidente Joko Widodo ho membru governu sira iha menutu 30 nia laran, hodi diskuti kooperasaun bilteral rai rua nian neebe estabelese durante nee.

Vizita Nee Xefi Governu akompanha husi Ministru Planeamentu Investimentu Estratéjiku (MPIE), Gastão de Sousa, Ministru Transporte no Telekomunikasaun, Miguel Marques Manetelo, Sekretariu Estadu Komunikasaun Sosial (SEKOMS), Expedito Dias Ximenes no ekipa Gabinete Fronteira Maritima no Terrestre.

(eme)

LEAVE A REPLY

Please enter your comment!
Please enter your name here