DILI, STLNEWS.co – Parlamentu Nasional (PN) liu husi reuniaun plenaria hili Izabel Maria Fernandes de Jesus substitui ka troka Expedito Dias Ximenes ba iha menbru Konselhu Imprensa (KI).
Bankada CNRT mak aprezenta kandidatu refere, neebe liu husi eleisaun sekretu ho votu afavor 39, kontra 0 no abstensaun 6.
“Nunee ita hili ka nomea ona membru ba KI kompleta ona,” dehan Prezidente Parlamentu Nasional Interina no Atual Primeira Visi Prezidente PN, Maria Terezinha Viegas liu husi plenaria iha PN, Tersa (05/09/2023).
Nia afirma, kandidatu ba membru KI iha lejislatura liu ba PN eleze membru ida mak Expedito Dias Ximenes, maibe nia agora asumi hela kargu nudar Sekretariu Estadu Komunikasaun Sosial (SEKOMS), ho nunee iha fulan Agostu liu ba loke fali ba submisaun kandidatura membru KI nian, no meza simu deit karta ida nomeasaun ba iha membru KI mak Bankada CNRT submete kandidatu feto ida.
Nunee Visi Sekretaria Meza Parlamentu Nasional, Maria Tereza Gusmao dehan, membru KI ida uluk neebe kandidatu husi Bankada CNRT mak Expedito Dias Ximenes, neebe agora sai ona membru IX Governu Konstituisional, nunee Bankada CNRT hakarak subtitui fali kandidata nain 1 mak Isabel Maria Fernandes de Jesus, nunee bele prienxe fila fali membru iha KI nian.
Entretantu, dekralasaun aseitasaun husi Izabel Maria Fernandes de Jesus katak, aseita ho nomeasaun husi PN nian hodi sai membru ba KI, i kompremitidu atu halao knaar tuir K-RDTL haruka.
(dom)
