DILI, STLNEWS.co – Reprezentante povu iha uma fukun Parlamentu Nasional (PN) liu husi Deputadu Bankada FRETILIN, Dario Madeira, husu ba autoridade lokal sira iha suku laran tenki halo servisu ho seriu iha programa distribuisaun sesta bazika, atu nunee familia reklamante bele hetan sira nia direitu.
“Hau husu ba iha Xefi Suku ho Xefi Aldeia sira tenki halo servisu ho seriu i besik ba populasaun sira hodi rekolha sira nia fisa familia atu bele atende sira, tanba sira tinan uluk la hetan no tinan nee la hetan nafatin duni, ida nee laos primeira vez deputadu sira levanta, maibe iha primeira faze fahe sesta bazika ami sempre koalia beibeik, maibe laiha atendimentu, i too agora tama ona ba iha segunda faze, populasaun reklamante sira nee laiha diretu nafatin, nee ladun diak,” dehan nia iha PN, Kinta nee (21/07/2022).
Nia afirma, husu ba governu atu bele tau matan ba iha situasaun ida nee, hodi familia sira neebe tama iha reklamante atu hetan mos sira nia diretu ba iha distribuisaun sesta bazika nee.
Aleinde nee mos Deputadu Bankada CNRT, Jose Virgilho hatete, sesta bazika neebe fahe ba iha populasaun sira iha Suku Komoro, sira neebe reklamante too agora seidauk hetan.
“Tanba nee husu ba iha governu atu rezolve problema ida nee, kompanhia mak lakohi fahe ka keta Xefi Aldeia iha Fomentu 2 nian mak lakohi fahe ba iha ninia populasaun sira,” hakotu nia.
(dom)
