DILI, STLNEWS.co – Tetu Orsamentu Jeral Estadu (OJE) tinan 2024, Parlamentu Nasional (PN) husu envelope fiskal tokon US$ 22, hodi finansia atividade parlamentu nian iha tinan oin.
“Ami sei inklui iha OJE 2024, hahu ohin ami komesa halo ajustamentu neebe presiza atu halo, ami nia envelope fiskal momentu husu US$ 22 milhoens, mais depois komisaun sira elabora idak-idak nian sae ba US$ 27 milhoens,” dehan Prezidente Parlamentu Nasional (PPN), Maria Fernanda Lay ba jornalista sira iha PN, Kuarta (11/10/2023).
Fernanda Lay hatete, maibe sei hatoo iha envelope fiskal, neebe governu aprova iha diskusaun iha grupu para elabora orsamentu nian atu hatun, neebe kontas korrentes parlamentu nian 12 milhoens, com essesão de kapital menor no kapital dezenvolvimentu, entaun sinal katak, PN tenke ajusta.
“Prioridade ami identifika ona, i agora entre prioridade sira ida neebe mak prioridade liu ba tinan oin. Edifisiu parlamentu nian, ami presiza rai, hau hatete dala barak ona, rai laiha ba halo iha neebe, hau hanoin melhoramentu ba edifisiu Cobi House tenki hasai, tanba la seguru ba funsionariu servisu iha andar leten, neebe hau hanoin preokupasaun ami nian reabilita edifisiu atu ami bele mantein nafatin servisu iha nee,” afirma PPN.
(dom)
