DILI, STLNEWS.co – Deputadu sira iha Parlamentu Nasional (PN) kontinua husu governu, liu husi Ministeriu Obras Publik (MOP) hadia estrada no ponte neebe aat iha Munisipiu Manufahi.
Lia hirak nee hatoo husi Deputadu Bankada FRETILIN, Antoninho Sarmento katak, kondisaun estrada ho ponte iha Munisipiu Manufahi, asuntu sira nee levanta beibeik, hein IX Governu tenki haree ona prioridade ba estrada no ponte sira neebe aat.
“Liu-liu ita haree parte sul, Munisipiu Manufahi, tanba parte sul nee pontensia boot ba agrikultura, ita husu IX Governu bele atensaun ba estrada no ponte sira neebe aat, hodi fasilita komunidade sira nia movimentu”, katak Deputadu husi Bankada FRETILIN Antoninho Sarmento ba STL iha Parlamentu, Tersa nee (19/09/2023).
Nia dehan, ho Orsamentu Retifikativu neebe foin lalais aprova, espera katak governu bele fo atensaun mos ba infraestrutura, tanba kondisaun estrada aat difikulta movimentu komunidade atu transporta sira nia produtu ba merkadu, laos nee deit, maibe difikulta mos movimentu transporte publiku no privadu sira bainhira halao atividade kada loron.
Karik iha OR mak la preve, maibe iha OJE 2024 tenki atensaun masimu husi Ministeriu Obras Publik (MOP), atu aloka osan ba hodi hadia estrada Luak, Alas, Belaluhu, too ba Vikeke, nunee fasilita povu sira, hodi labele fo risku ba komunidade.
Nunee mos Deputadu Bankada CNRT, Natalino dos Santos hatete, hadia estrada no ponte iha Munisipiu Manufahi, nee depende ba MOP rekomendasaun, husi parlamentu rekomenda ba MOP atu haree, maibe koalia atu halo implementasaun depende ba orsamentu, tanba haree ba Orsamentu Retifkativu 2023 nee, inklui ka lae ba manutensaun.
Nia fiar katak programa IX Governu nian iha programa barak atu reabilita, estrada husi nasional too suku sira, tanba nee rekomenda ba MOP atu haree kestaun hirak nee, hodi halo aktualizasaun ka hadia infraestrutura bazika iha kraik, hodi povu sira asesu diak ba estrada, halao atividade negosiu ka buka moris loron-loron.
Entretantu, Deputadu Bankada KHUNTO Luis Roberto hatete, liga estrada no ponte aat, nee laos deit iha Munisipiu Manufahi, maibe kuaze teritoriu laran, tanba nee nafatin rekomenda ba governu atu atensaun ba kondisaun estrada no ponte sira neebe mak aat.
Liu-liu ba estrada ho ponte neebe mak hetan estragus husi situasaun kalamidade neebe akontese.
Tuir nia, nafatin rekomenda ba governu liu husi MOP atu atensaun ba estrada no ponte sira iha Timor laran.
(gui)
