DILI, STLNEWS.co – Reprezentante povu iha uma fukun Parlamentu Nasional (PN) husu justifikasaun IX Governu liu husi Ministeriu Solidariedade Sosial (MSS), neebe aumentu US$ 7 hodi fo ba benefisiariu idozu sira.
Deputadu Gabriel Soares hatete, osan milhaun US$ 8 neebe mak transfer ba iha MSS hodi halo pagamentu ba idozu sira, hakarak hetan esplikasaun klaru, tanba orsamentu 2023 iha V lejislatura, hanoin inan-aman no ferik-katuas sira uluk governu anterior tau US$ 30, depois aumenta US$ 20 hodi sae ba US$ 50.
“Mais situasaun iha plenaria ami haree oin sin ba malu, mais konsege ami nia proposta nee pasa ho votus maioria, hodi muda US$ 30 nee sae ba US$ 50 ba idozu sira nee aprova ho lei, maibe hakfodak teki-teki mosu aumentu iha US$ 7, mais US$ 7 nee uja dekretu lei governu, preokupasaun mak ida ho lei, no ida ho dekretu lei governu,” dehan Deputadu Gabriel Soares iha PN, Kuarta 16/08/2023).
Nia tenik, entaun hakarak husu ninia validade nee oinsa, tanba nia objetivu ida deit atu halo pagamentu ba idozu, nunee hakarak hetan esplikasaun.
Aleinde nee, Xefi Bankada PLP, Deputada Maria Angelina Lopes Saramento hatete, husi informasaun katak fundu rezerva seguransa sosial dehan la depozita ona iha BCTL, maibe rai hotu iha banku komersial sira.
“Hau hakarak hatene objetivu rai osan iha banku komersial ba saida nian, agora seguransa sosial nian Ministra hatete iha aumentu ba millaun 8,” dehan nia.
Nia hatuir, maibe Ministru Asuntu Parlamentar mai tuir reuniaun ordinaria plenaria iha Parlamentu dehan, US$ 7 nee aumentu ida ba objetivu kampanha politika nian, se rajaun ida nee hodi tau millaun 8 hodi aumenta ba milhaun US$ 57, nunee hakarak husu esplikasaun.
Ministra Solidariedade Sosial, Veronica das Dores, dehan, “aumenta US$ 7 ba benifisiariu idozu nee politika IX Governu kontinua implementa VIII Governu nia politika, tanba lei ida nee mai husi VIII Governu. Kuandu ami halo diskusaun no aprezenta situasaun nee ba PM, no PM dehan bele kontinua, tanba ami haree ba artigu 10 neebe entende katak lina pobreza, no estudu nee mai husi Banku mundial, entaun ita haree kada loron se nia hetan 1,90 sentimu kali loron 30 mak, hetan US$ 57,” esplika nia.
Nia tenik, tanba haree ba idade ferik-katuas sira nia mos avansadu, maibe primeriu husi INSS aprezenta lakohi implementa politika Goevernu anterior aumentu 7 dolar, tanba osan atu foti husi neebe.
“Maibe ho ezersisu boot ida hodi hetan millaun 8, hodi kontinua VIII Governu nia politika, no lei nee mai husi Governu anterior mak halo, laos IX Governu mak halo,” tenik nia.
Nia dehan, politika IX Governu nian mantein no la koa US$ 7 husi politika governu atnerior nian, hodi mantein US$ 57 fo ba benefisiariu idozu sira, inklui ema ho difisiensia sira.
(dom)
