DILI, STLNEWS.co – Membru Parlamentu Nacional (PN) husu IX Governu liu-liu Ministeriu Transporte no Telekomunikasaun (MTT), atu tun ba terenu identifika kauza saida mak motorista mikrolet 03 ho 010 halo greve, hodi lakohi tula pasajeiru sira.
“Konaba ezijensia motorista nian halo greve, MTT tenki haree lo-loos tarefa ba mikrolet sira halai Dili laran nee. Pasajeiru sira tenki selu hira, tanba mina kada loron sae hela deit,” dehan Deputadu Bankada CNRT, Marcos Xavier ba jornalista sira iha PN, Kinta nee (05/10/2023).
Marcos hatete, mina sae laos iha Timor deit, maibe problema mundial, tanba funu entre Ukraina ho Russia nia impaktu mai too iha Timor.
“Husu governu tenki tun ba terenu haree saida mak akontese atu ita bele hatene kauza nee husi neebe labele hodi ema individual, ema ida nia impoin hakarak impede hotu ema seluk nia hakarak, nee labele, governu iha dever no moral atu rezolve problema sira nee,” tenik nia.
Hatan ba kestaun nee, Ministru Transporte no Telekomunikasaun, Miguel Manetelo hatete, MTT sei buka informasaun uluk ba Direção Nacional Transporte Terrestre (DNTT), nunee sira bele fasilita dadus ruma liga ho tarifariu ba pasajeiru sira.
“Informasaun detalhu kona ba mikrolet sira mogok nee, hau seidauk hetan husi diresaun kompotente, mais bazeia ba informasaun husi media katak, motorista sira halo greve ida tanba mina folin sae, no seluk mak pasajeiru sira selu la tuir tarefa, maibe konaba mina folin sae, hau lakohi fo komentariu,” hatete nia.
Atu hatete deit konaba tarifariu ba pasajeiru sira karik selu la tuir standar ka tarifa neebe iha, mak MTT tenta husu hela informasaun ba Direção Nacional Transporte Terrestre atu fornese informasaun konaba asuntu nee.
Nia haktuir, governu sei haree tarifariu neebe propriu ba pasajeiru sira, maibe tenki halo analiza oi-oin hodi bele hetan kustu ida neebe los, mais atu hasai analiza ida los mak tenki iha dadus uluk husi DNTT. Neebe Diretor Jeral MTT komunika ona ho parte DNTT atu fo lo-loos informasaun liga ho tarifariu ba pasajeiru adultu sira.
(dom)
