DILI, STLNEWS.co – Parlamentu Nasional (PN) husu governu atensaun ba situasaun kalamidade semana hirak liu ba, hodi normaliza estrada no apoia vitima sira neebe seidauk hetan apoiu.
Kestaun née hatoo husi Deputadu José da Cruz husi Bankada FRETILIN katak, hakarak repete situasaun semana rua liu konaba komunidade iha Postu Administrativu Lolotoe, situasaun kalamidade iha semana hirak liu ba too agora seidauk iha normalizasaun ba estrada.
“Situasaun nee prezudika komunidade sira atu halo movimentu, tanba kondisaun estrada grave neebe afeta husi kalamidade”, katak Deputadu Bankada FRETILIN, José da Cruz iha plenaria, Segunda (24/07/2023) iha PN.
Nia dehan, ekipamentus Institutu Jestaun Ekipamentus (IGE) iha neeba ona, maibe oituan deit, labele halo servisu ho masimu.
Husu ba ministeriu relevante atu haree hodi normaliza konetividde estrada iha postu mai munisipiu, tanba kondisaun estrada aat tebes.
“Laos nee deit, maibe iha uma kain balu iha Lolotoe seidauk hetan apoia ruma husi governu”, tenik nia.
Tanba nee, tuir Deputadu, husu ba meza parlamentu atu hatoo mos ba ministériu relevantes lalais apoia komunidade sira.
Nunes mos Deputada Bankada PD atual Visi Primeira Sekretaria Meza PN, Maria Teresa Gusmão hatete, situasaun kalamidade neebe akontese presiza tebes atu governu fo atensaun masimu, tanba nee iha Orsamentu Retifikativu mai, governu sei tau mos prioridade.
Hatan ba kestaun nee, Prezidente Parlamentu Nasional, Maria Fernanda Lay hatete, obrigadu bolu atensaun ba governu atu apoia ba situasaun hirak nee.
“Hau hanoin governu sei prepara Orsamentu Retifikativu, tanba nee Komisaun sira mos kestiona governu”, katak PPN Lay.
Tuir PPN, husu mos ba komisaun sira atu halo mos fiskalizasaun, nunee fo atensaun ba governu, espera tempu badak governu atensaun ba asuntu nee.
(gui)
